"ამ არარსებულ "დისბაქტერიოზზე" გამოკვლევას რატომ აფინანსებენ?" - მაია ბუწაშვილი

ინფექციონისტი მაია ბუწაშვილი მიიჩნევს, რომ ე.წ.“დისბაქტერიოზის ანალიზი“ არაფრის მომცემი კვლევაა და მის ჩატარებაზე დროისა და ფინანსების ხარჯვა არ ღირს.

ექიმის განმარტებით აღნიშნული კვლევა მხოლოდ პოსტსაბჭოთა ქვეყნებში შემორჩა და კვლევის შედეგს, პაციენტის მკურნალობაში არანაირი ცვლილების შეტანა არ შეუძლია.

„რისთვის ფლანგავენ პაციენტები ფულს "დისბაქტერიოზის ანალიზისთვის"? ან სადაზღვევო კომპანიების გამკვირვებია, ბევრ მართლა მნიშვნელოვან ტესტზე უქმნიან პაციენტებს პრობლემას და ამ არარსებულ "დისბაქტერიოზზე" გამოკვლევას რატომ აფინანსებენ?

ეს დიაგნოზი და კვლევა მხოლოდ პოსტსაბჭოთა ქვეყნებში შემორჩა და რეალურად პაციენტის მართვაში არაფერს იძლევა.

გასაგებია, რომ დისბიოზი არსებობს და ნიშნავს "კარგ" და "ცუდ" ბაქტერიებს შორის ბალანსის დარღვევას, მაგრამ ამის ზომვა (და შემდეგ მკურნალობის მერე "გადამოწმება") არაფრისმომცემია.

დისბიოზის მიზეზები ბევრია (ანტიბიოტიკოთერაპია, სხვადასხვა ინფექციური და არაინფექციური ქრონიკული დაავადებები, სტრესი და სხვ.) და ამ დროს, კიდევ ვიმეორებ, ამ ბაქტერიების რაოდენობის განსაზღვრა, კლინიკური მართვისთვის არ გამოიყენება და არც ერთ ოფიციალურ საერთაშორისო კლინიკურ რეკომენდაციაში არ არსებობს.

არადა, უამრავ პაციენტს მოაქვს ამ კვლევის პასუხი და მოლოდინი აქვთ, რომ რაღაც ინტერპრეტაცია უნდა გავუკეთოთ და მკურნალობა დავუნიშნოთ, რაც "დისბაქტერიოზზე გამოკვლევის" შედეგად არ ხდება,“ - წერს ექიმი სოციალურ ქსელში.