თავის არეში ჭარბი ოფლიანობა - D ვიტამინის ნაკლებობის ნიშანი? - პედიატრი ძმების განმარტება

ბევრ მშობელს აწუხებს კითხვა, არის თუ არა ბავშვის თავის არეში ჭარბი ოფლიანობა, რაქიტის ან D ვიტამინის ნაკლებობის ნიშანი?

პედიატრი ძმები - დავით და კონსტანტინე ჩახუნაშვილები განმარტავენ, რომ რეალურად ეს ორი მოვლენა პირდაპირ კავშირში არ არის. ოფლიანობა რაქიტის დიაგნოზს არ ნიშნავს და სანამ ეს სიმპტომი(ოფლიანობა) გამოვლინდება, ბავშვს სხვა, უფრო სერიოზული ნიშნები უნდა შევამჩნიოთ.

“ჩვენ შეგვიძლია გითხრათ, რომ ჭარბოფლიანობა, D ვიტამინთან არ არის დაკავშირებული.

რაქიტის დროს, როდესაც უკვე დაავადება გამოვლინდება, შესაძლებელია თავის არეში ოფლიანობა შევამჩნიოთ, მაგრამ სანამ თავის არეში ოფლიანობა წამოვა, მანამდე რაქიტის სხვა ნიშნებიც იქნება გამოვლენილი - როგორიც არის:

• თავის ქალის მიდამოში რბილი ძვლები;
• კეფის და შუბლის მიდამოს გამობერილობა;
• მოტორული შეფერხება;
• ასევე ზრდაში ჩამორჩენა;

ეს ის სიმპტომებია, რომლებსაც პედიატრმა და მშობელმა ყურადღება უნდა მიაქციონ.

თუ ბავშვს ზემოთ ჩამოთვლილი სიმპტომები არ აღენიშნება, მხოლოდ თავის ოფლიანობა რაქიტზე არ მიუთითებს და ეს შეშფოთების მიზეზი არ უნდა გახდეს,” - განმარტავენ პედიატრი ძმები.