"ჩემთვის ძალიან მოულოდნელი და სასიხარულო ამბავი" - რა ამბავს გვიზიარებს ლანა ღოღობერიძე

იაპონიის ელჩმა ბატონმა იშიძუკა ჰიდეკიმ რეზიდენციაში გამართულ ღონისძიებაზე, კინორეჟისორს, ქ-ნ ლანა ღოღობერიძეს, როგორც 2025 წლის შემოდგომის უცხოელი მოქალაქეების ორდენის ერთ-ერთ მიმღებს, ოქროს სხივებითა და ვარდით დამშვენებული ამომავალი მზის ორდენი გადასცა.

ქ-მა ღოღობერიძემ 1987 წელს ფილმ „ორომტრიალისთვის“ ტოკიოს მეორე საერთაშორისო კინოფესტივალზე საუკეთესო რეჟისორის ჯილდო მოიპოვა. ასევე, 2019 წელს იაპონიაში აჩვენეს „ოქროს ძაფი“ (2019) - ფილმი, შთაგონებული იაპონური კერამიკის გამთლიანების ტრადიციული ტექნიკით „კინცუგით“ (ოქროთი შეკეთება). ამ ნამუშევრებით მან დიდი ყურადღება გამოიჩინა იაპონური ტრადიციული კულტურის მიმართ.

ელჩმა იშიძუკამ დააფასა ქ-ნი ლანას იაპონიასა და საქართველოს შორის კულტურულ გაცვლასა და ურთიერთგაგების განვითარებაში შეტანილი წვლილი და გადასცა ორდენი და დიპლომი, რისთვისაც ქ-ნმა ლანამ გულწრფელი მადლიერება გამოხატა - წერია იაპონიის საელჩოს გვერდზე.

***

ჯილდოს მიღებას რეჟისორი ფისბუქზე ლაკონურად ეხმიანება.

ლანა ღოღობერიძე: ჩემთვის ძალიან მოულოდნელი და სასიხარულო ამბავი. იაპონიის იმპერატორმა დამაჯილდოვა ამომავალი მზის ორდენით.