"ჭოლა მამაჩემის სახელია და მე შემრჩა" - ლევან წულაძე

რეჟისორმა ლევან წულაძემ, რომელსაც არა მარტო მეგობრები, მთელი საზოგადოება "ჭოლას" სახელით იცნობს, ეკა ჩხეიძის გადაცემაში "პირველი სტუდია", ზედმეტსახელის წარმოშობის ისტორია გაიხსენა და აღნიშნა, რომ საკუთარ სახელზე - "ლევანზე" მეტად, ზედმეტსახელი "ჭოლა" მოსწონს.

"ჭოლა მამაჩემის სახელია... ეს ამბავი სკოლიდან იწყება, ბავშვობიდან მოდის... მეოთხე კლასში, მეგობრები ერთმანეთს მამის სახელებით მივმართავდით - კიმო, ბაკურა, ჭოლა...მერე მე შემრჩა ეს სახელი, რადგან მომწონდა.
ჯერ ერთი მოკლე სახელია და კარგია. თან ასეთი "ნიკნეიმი" რომ გაქვს, თითქოს უკვე რაღაც ხარ, ბიოგრაფია გაქვს და ესეც მომწონდა...
მამაჩემი რომ გარდაიცვალა, მერე რაღაც ფორმა მიიღო ამ სახელის ტარებამ, თითქოს ვაგრძელებ მის ცხოვრებას," - ამბობს რეჟისორი.