"ერთმანეთი ვიპოვეთ" - თათიას და დათუნას ტანდემის ისტორია

იუმორისტ თათია სულუაშვილის ტანდემი ინფლუენსერ დათუნა ტატულაშვილთან, უკვე კარგად აწყობილ-შემდგარია. შეხუმრებულ წყვილს, სხვადასხვა კომპანიები, თავიანთ რეკლამას თვალდახუჭული ანდობენ. თათიას და დათუნას წყვილიც, რეკლამას - კომედიურ სტილში, შარჟით, იუმორით, ზოგჯერ შავით და ზოგჯერ - იუმორესკით, თავს მშვენივრად ართმევენ. მაყურებელი და გამომწერი, იცოცხლეთ, უამრავი ჰყავთ. დამკვეთს მეტი რა უნდა?

"ზმნასთან" თათია ამ ტანდემზე საუბრობს.

თათია სულუაშვილი: ერთმანეთი, რაღაცნაირად, შემთხვევით ვიპოვეთ. ვანო ჯავახიშვილმა მითხრა, დათუნა მომყავსო. მე მაშინ ტიკტოკი არ მქონდა და სოციალურ ქსელში აქტიური არ ვიყავი. დათუნა ტელევიზიაში მოვიდა და აქ გავიცანი. მერე პატარ-პატარა ვიდეოების გადაღება დავიწყეთ და ჩვენზე რეკლამის მოთხოვნა წამოვიდა.

დაგვიკვეთეს რეკლამა, მივედით და კარგად ავუწყეთ ერთმანეთს.

პარტნიორს დიდი მნიშვნელობა აქვს. შეიძლება ითამაშო პარტნიორთან ერთად, მაგრამ შენიანი არ იყოს. ჩემსა და დათუნას შორის ემოციური კავშირი აღმოჩნდა. ერთად ხუმრობა კარგად გამოგვივიდა.

მე რომ დავიწყებ, ის ზუსტად "აკანცოვკებს". ერთ ხაზზე მივდივართ.

მერე, ერთ რეკლამას მეორე მოჰყვა, მეორეს - მესამე და შევეწყეთ. დუეტიც გავხდით. ეს ძალიან ბუნებრივად მოხდა. მიზანმიმართული გადუეტება არ ყოფილა. ორგანულად შევეწყეთ ერთმანეთს.

ცხადია, მასაც მოსწონს. როცა რაიმე არ მოსწონს, არ აკეთებს.

დღემდე ვამბობთ, დათუნა რომ არა, ტიკტოკი არ გვექნებოდა. მან გვიბიძგა, მოდით, ვიდეოები გადავიღოთო. და მერე ამ ვიდეოებს მოჰყვა კიდეც რეკლამები...