"გთავაზობთ ჯანმრთელობის „გადატვირთვის“ სტრატეგიას" - ნატა გაგუა

ახალი წელი ის დღესასწაულია, რომელსაც ადამიანები ახალი იმედებით, ახლი მიზნებით და ოცნებებით ხვდებიან. ეს დღესასწაული ძველზე უარის თქმასა და ახლის დასაწყისთან ასოცირდება. ამიტომაც ხდება ის ადამიანებისათვის სიახლეების ინსპირაცია.

სწორედ მათ, ვინც ახალი წლიდან წონასთან ბრძოლა და საკუთარ სხეულთან „ჰარმონიული თანამშრომლობა" გადაწყვიტა, ტრანსფორმაციის რეცეპტს უზიარებს ნუტრიციოლოგი ნატა გაგუა.

საახალწლო ტრანსფორმაცია:

ახალი წელი ახალი დასაწყისის სიმბოლოა — დრო, როდესაც ვცდილობთ, უკან მოვიტოვოთ ძველი ჩვევები და გავხდეთ საკუთარი თავის უკეთესი ვერსია. თუმცა, როდესაც საქმე ჯანმრთელობასა და წონას ეხება, ეს „ახალი დასაწყისი“ ხშირად მტანჯველ, მკაცრ დიეტასა და სხეულთან ბრძოლასთან ასოცირდება. ჩემი მიზანი არ არის მორიგი „სასწაულმოქმედი“ გეგმის შემოთავაზება. მე გთავაზობთ ჯანმრთელობის „გადატვირთვის“ სტრატეგიას, რომელიც ეფუძნება არა შეზღუდვებს, არამედ საკუთარი ორგანიზმის ბიოლოგიისა და ფსიქოლოგიის ღრმა გააზრებას.

შეწყვიტეთ ბრძოლა და დაიწყეთ ჰარმონიული თანამშრომლობა სხეულთან. მიზანია, ახალ წელს შევხვდეთ არა მხოლოდ ნაკლები კილოგრამებით, არამედ მეტი ენერგიით, უკეთესი განწყობითა და სხეულთან ჰარმონიაში.

პირველი რჩევა: შეწყვიტეთ ბრძოლა სეზონურ ბიოლოგიასთან — იმუშავეთ მასთან.

შემოდგომასა და ზამთარში წონის მატებისკენ მიდრეკილება და „მანუგეშებელი საკვებისადმი“ (comfort food) ლტოლვა სუსტი ნებისყოფის ნიშანი სულაც არ არის. ჩემს კლინიკურ პრაქტიკაში ხშირად ვხედავ, როგორ იდანაშაულებენ ადამიანები თავს ამ ბუნებრივი მოვლენის გამო. სინამდვილეში, ეს ჩვენი ორგანიზმის ღრმა, ევოლუციურად ჩამოყალიბებული რეაქციაა. ამ ფენომენს ორი ძირითადი მეცნიერული მიზეზი აქვს: მეტაბოლური და ნეიროქიმიური. მეტაბოლური თვალსაზრისით, ჩვენი ორგანიზმი გენეტიკურად დაპროგრამებულია ზამთრისთვის ცხიმის დასაგროვებლად. ეს ხდება მეტაბოლიზმის ბუნებრივი შენელებისა და სეზონური ინსულინრეზისტენტობის ზრდის ხარჯზე — ჩვენი უჯრედები ნაკლებად მგრძნობიარე ხდება ინსულინის მიმართ, რაც ღვიძლს აძლევს სიგნალს, დააგროვოს ენერგია ცხიმის სახით. ნეიროქიმიური კუთხით კი, დღის სინათლის შემცირება იწვევს სეროტონინის, იგივე „ბედნიერების ჰორმონის“, დონის კლებას. ორგანიზმი ინსტინქტურად ეძებს მისი დონის ამაღლების გზას, ნახშირწყლებით მდიდარი საკვები კი ამ პროცესის ერთ-ერთი ყველაზე სწრაფი სტიმულატორია.

იმის ნაცვლად, რომ ებრძოლოთ ამ ბუნებრივ ლტოლვას, განაახლეთ მისი კონცეფცია. ეს არის საკუთარ სხეულთან მუშაობის პირველი პრინციპი. მაგალითად, კრემიანი ნამცხვრის ნაცვლად, რომელიც სისხლში შაქრის დონის მკვეთრ მერყეობასა და შემდგომ ენერგიის ვარდნას იწვევს, მოამზადეთ შემწვარი გოგრის კრემ-სუპი. რატომ მუშაობს ეს ალტერნატივა? ფსიქოლოგიურად, შეწვა აძლიერებს გოგრის ბუნებრივ სიტკბოს, ხოლო კრემისებრი ტექსტურა ქმნის დანაყრებისა და კომფორტის შეგრძნებას. ფიზიოლოგიურად კი, კერძში ჯანჯაფილისა და კურკუმას დამატება მას არა მხოლოდ გამათბობელ არომატს, არამედ ანთების საწინააღმდეგო ეფექტსაც სძენს და ორგანიზმს ბოჭკოთი და ვიტამინებით ამარაგებს. თქვენ აკმაყოფილებთ სხეულის მოთხოვნას კომფორტზე, მაგრამ ამას აკეთებთ ჯანსაღი ინგრედიენტებით.

სწორი არჩევანის გასამარტივებლად, თქვენს რაციონში ჩართეთ შემდეგი პროდუქტები:

• კომპლექსური ნახშირწყლები: ტკბილი კარტოფილი, ქინოა, წიწიბურა.
• ჯანსაღი ცხიმები: ნიგოზი, ორაგული, ავოკადო, ჩიას თესლი.
• ცილები და ბოჭკო: ოსპი და ლობიო.

როდესაც ვმუშაობთ ჩვენს სეზონურ ბიოლოგიასთან და ვირჩევთ ნუტრიენტებით მდიდარ „მანუგეშებელ საკვებს“, ჩვენ ვქმნით მყარ საფუძველს ჩვენი ჰორმონალური სისტემების მხარდასაჭერად,' - წერს ექიმი ნუტრიციოლოგი.