"ღვთისმშობლის გველები" - სასწაული, რომელიც ყოველ მარიამობას აღესრულება

ეს სასწაული, შესაძლოა, ძნელად დასაჯერებლად ჟღერდეს, მაგრამ ალბათ, გსმენიათ - "ნეტარ არიან მორწმუნენი".

მოკლედ, კუნძულ კეფალონიაზე წელიწადში მხოლოდ ერთხელ, ყოველ მარიამობას, ღვთისმშობლის მიძინების ტაძარში, ყოველწლიურად აღესრულება სასწაული - ხატის თაყვანის საცემად შხამიანი გველები მოდიან. მაგრამ ამ დღეს ისინი სრულიად უწყინარნი ხდებიან.

ხატს "გველის ღვთისმშობელს" უწოდებენ, გველებს - "ღვთისმშობლის გველებს". სასწაულია, სხვა რა არის, კლდიდან გამოდიან გველები, შედიან ტაძარში და იქ დაბრძანებულ ღვთისმშობლის ხატებზე განლაგდებიან.

ორი სოფელია, სადაც ეს სასწაული ფიქსირდება – არჯინია და მარკო პულოსი. სოფელ არჯინიაში მდებარე ისტორიულ ტაძარში, ეს ყველაფერი, დაახლოებით მე-14 – მე-15 საუკუნეში დაიწყო.

მთაზე მდებარე ტაძარში იყო დედათა მონასტერი, რომელსაც ძალიან ხშირად თავს ესხმოდნენ მეკობრეები. ერთ-ერთი ასეთი თავდასხმის დროს, როგორც ლეგენდა გვიყვება, მეკობრეებმა ალყა შემოარტყეს მონასტერს. დედებმა დახმარება ღვთისმშობელს სთხოვეს, რომელმაც ისმინა თხოვნა და ისინი გველებად გადააქცია.

ლეგენდის მიხედვით, დედები გველების სახით გამოდიან ტაძარში და ეს ყოველ მარიამობას ხდება. როგორც იქ ამბობენ, ეს გველები სხვა დროს არსად არ ფიქსირდებიან. სწორედ 28 აგვისტოს გამოდიან და ერთი კვირის შემდეგ უკან, კლდეში ბრუნდებიან, მთელი წლის განმავლობაში კი მათი ნახვა თითქმის შეუძლებელია. ერთი კვირის განმავლობაში ეს გველები არიან საოცრად მშვიდნი და კეთილგანწყობილნი. ადამიანებს არ ერჩიან. ამ გველებისთვის დამახასიათებელი ნიშანია მათი სხეულის სითბო; და მთავარი - მათ თავზე ჯვრები აქვთ გამოსახული!

ამ პატარა სოფელში ყოველ ღვთისმშობლობას ათეულობით ათასი ადამიანი ჩადის. თავდაპირველად ტაძარი კლდეზე იყო მიდგმული, კლდის გარშემო იყო გაშენებული მონასტერიც, ახლა ასე აღარ არის, ტაძარი დაინგრა და დაახლოებით 50 მეტრში ახალი ღვთისმშობლის ტაძარი ააშენეს.

ვიდეო

მარიამობას, არსაიდან გამოჩენილ გველებს, მორწმუნეები შიშველი ხელებით ეხებიან. მიჩნეულია, რომ ეს გველები თავისი სახეობით უნიკალურნი არიან, მსოფლიოში სხვაგან არსად გვხვდებიან. მათ თავზე ოთხი შავი წერტილი ჯვრის ფორმას ქმნის. მათი გამოჩენა ძალზე კარგ ნიშნად ითვლება.