ირანელი პროტესტანტი, ერფან სოლტანი გირაოთი გაათავისუფლეს

გავრცელებული ცნობების თანახმად, 26 წლის ირანელი პროტესტანტი, რომელსაც, გასულ თვეში, ანტისამთავრობო პროტესტთან დაკავშირებით სიკვდილით დასჯა მიესაჯა, გირაოთი გაათავისუფლეს.

ერფან სოლტანი 8 იანვარს, თეირანის დასავლეთით მდებარე ქალაქ ფარდისში დააკავეს. ქვეყანაში მოწყობილმა საპროტესტო აქციებმა, ირანის ხელისუფლების მხრიდან, სასიკვდილო რეპრესიები გამოიწვია. ოფიციალურმა პირებმა სოლტანის ოჯახს აცნობეს, რომ მისი სიკვდილით დასჯა რამდენიმე დღეში იგეგმებოდა. თუმცა, ირანის სასამართლომ უარყო, რომ მას სიკვდილით დასჯა მიესაჯა და განაცხადა, რომ ბრალდებები მხოლოდ თავისუფლების აღკვეთას ითვალისწინებდა.

ადვოკატის თქმით, ირანელი პროტესტანტის გათავისუფლებისთვის გადახდილია „ორი მილიარდი ტომანის“ (დაახლოებით 12,600 აშშ დოლარი; 9,200 ფუნტი სტერლინგი) ოდენობის გირაო.

„ჰენგაუმ“ და ირანულმა მედიამ, მათ შორის ნახევრად ოფიციალურმა ირანულმა საინფორმაციო სააგენტო „ისნამ“ განაცხადა, რომ სოლტანი გირაოთი გაათავისუფლეს.

ტანსაცმლის მაღაზიის მფლობელის, ერფან სოლტანის დაპატიმრებამ მთელი მსოფლიოს მედიის ყურადღება მიიპყრო, როდესაც გავრცელდა ინფორმაცია, რომ ის, სავარაუდოდ, სიკვდილით უნდა დაესაჯათ. იმ დროს სოლტანის ერთ-ერთმა ნათესავმა BBC Persian-ს განუცხადა, რომ სასამართლომ სიკვდილით დასჯა „ძალიან სწრაფი პროცესით, სულ რაღაც ორ დღეში“ გამოუტანა.