"ისე სწრაფად აგვისრულა სურვილი უწმინდესმა, გაოცებაც ვერ მოვასწარი" - მრევლი სამებაში მომხდარ ამბავს ჰყვება

ერთ-ერთი მოქალაქე, ნინო ხაბეიშვილი, ვინც გუშინ პატრიარქს, აუარებელ ხალხთან ერთად, სამებაში გამოეთხოვა, ფეისბუქზე წერს, თუ როგორ მყისიერად ისმინა და შეუსრულა სურვილი უწმინდესმა.

"დილის 5 საათზე მივედი პატრიარქთან გამოსამშვიდობებლად და გამიხარდა, რომ სწორად გავთვალე დრო. ხალხი ცოტა იყო, პირველ რიგში დავდექი, მასთან ძალიან ახლოს. ჩემს წინ ერთი "მკაცრი" სტიქაროსანი იდგა, კუშტი გამომეტყველებით დირექტორობდა ირგვლივ ყველას და ყველაფერს. მის საწინააღმდეგო მხარეს კი "კეთილი" სტიქაროსანი მომლოცველებს ჯვრებს ართმევდა, პატრიარქს ხელზე ადებდა და უბრუნებდა ისევ პატრონებს. ამის შემხედვარე, ჩემს გვერდით მდგომ ქალბატონსაც გაუჩნდა სურვილი, თავისი ჯვარი შეხებოდა პატრიარქის წმინდა სხეულს და თხოვა ჩვენს წინ მდგარ "მკაცრ" სტიქაროსანს. მან ხისტად მიუგო - არ არის საჭირო (რა იცის მან, რა არის საჭირო და რა - არა?)

ქალბატონმა უკმაყოფილოდ ჩაილაპარაკა, უჟმურიო და გააგრძელა ბორგვა. ვერ ისვენებს. რომ არ გაჩერდა, მივუბრუნდი და ჩურჩულით ვუთხარი, ქალბატონო, ჩვენი პატრიარქი იყო საოცრად მომთმენი (ნებისმიერ ცილისწამებას მოთმინებით ხვდებოდა და პასუხს არასდროს უბრუნებდა ცილისმწამებელს), მოვითმინოთ ჩვენც და ნახავთ, რომ არ დაგვტოვებს უნუგეშოდ ჩვენი უწმინდესი-მეთქი. ეს ვთქვი თუ არა, ვხედავ, საწინააღმდეგო მხარეს მდგარი "კეთილი" სტიქაროსანი შურდულივით წამოვიდა ჩვენკენ, დატოვა თავისი პოსტი, მოვიდა, მხოლოდ ჩვენ ორს მოგვმართა, მომაწოდეთ თქვენი ჯვრებიო და პატრიარქს დაადო ხელზე ორივე ჯვარი კარგა ხანს. გაოცებაც ვერ მოვასწარი. ასე სწრაფად აგვისრულა სურვილი უწმინდესმა. მჯერა, რომ ძალიან მალე კიდევ ერთი წმინდანით გამდიდრდება ზეციური საქართველო და უდიდესი მეოხი გვეყოლება!" - წერს ნინო ხაბეიშვილი.