"ხატვის დროს მე ვისვენებ, ამიტომ ვკიდებ ფუნჯს ხელს..." - რას ჰყვებოდა პატრიარქი თავის ხატვის ნიჭზე

პატრიარქის მიერ შესრულებული ფრესკები დიდუბისა და რუსთავის ეკლესიებს და მანგლისის საპატრიარქო რეზიდენციას ამშვენებს. მის მიერ დაწერილი ხატები, საპატრიარქოსა და სხვადასხვა ეკლესიებში ასვენია.

როგორც უწმინდესი თავის ერთ-ერთ ძველ ინტერვიუში ამბობს, სკოლაში სწავლისას, ლიტერატურისა და ისტორიის გარდა, უყვარდა ხელოვნება, მუსიკა და ხატვა.

კათოლიკოს პატრიარქი ილია მეორე: ხატვა მიყვარდა. ჯერ ფანქრით ვხატავდი, შემდეგ აკვარელით, ზეთით. მაინცადამაინც მხატვარი არ გამოვიდა ჩემგან. ხატვის დროს მე ვისვენებ, ამიტომ ვკიდებ ფუნჯს ხელს, თორემ მე მხატვარი არ ვარ.

სასულიერო სემინარიაში ჩვენ გვასწავლიდნენ მუსიკას, ნოტებს. მე მესმის ნოტები, ვკითხულობ ნოტებს. ბავშვობიდან კარგი მუსიკალური სმენა მქონდა. როგორც სემინარიაში პედაგოგი ამბობდა, იდეალური სმენა მქონდა. ეს მელოდია ზეციდან მოდიოდა...