ხე, რომელიც 30 სართულიან შენობაზე მაღალია

წარმოიდგინე ხე, რომელიც 30 სართულიან შენობაზე მაღალია.

ეს არც მითია, არც ლეგენდა, ის რეალურად არსებობს და მას ჰქვია ჰიპერიონი.

ჰიპერიონი, სიმაღლით ისეთ ცნობილ ღირსშესანიშნაობებსაც კი აღემატება, როგორიცაა თავისუფლების ქანდაკება და ბიგ ბენი. მისი სიმაღლე დაახლოებით 116 მეტრია.

ჰიპერიონი კალიფორნიაში, რედვუდის ეროვნულ პარკში ცხოვრობს და მისი ზუსტი ადგილმდებარეობა გასაიდუმლოებულია, რათა ხე დაცული იყოს დაინტერესებული პირების გადაჭარბებული ყურადღებისგან.

გიგანტური ჰიპერიონი სანაპირო სექვოიას (Sequoia sempervirens) სახეობის წარმომადგენელია. ეს ხეები ცნობილია იმით, რომ ასწლეულებს კი არა, ათასწლეულებსაც ცოცხლობენ, აქვთ ხანძრისა და დაავადებების გადატანის საოცარი უნარი და სიმაღლეში ზრდას საუკუნეების განმავლობაში აგრძელებენ.

ახლა ჰიპერიონი დაახლოებით 700–800 წლისაა. როცა ის პატარა ნერგი იყო, ადამიანები ჯერ კიდევ ხმლით იბრძოდნენ და მსოფლიო ისეთი სულაც არ იყო, როგორიც დღესაა.