მაგნიუმი ცელულიტის წინააღმდეგ

მაგნიუმის როლზე ორგანიზმში დღეს ბევრს ლაპარაკობენ. ბოლო დროს აქტუალური გახდა მისი გავლენის განხილვა კანის მდგომარეობაზე, კონკრეტულად კი ცელულიტზე.

ნუტრიციოლოგი სანდრო გოგოხია განმარტავს, რომ მიუხედავად გავრცელებული მითისა, მაგნიუმი პირდაპირ არ „წვავს“ ცელულიტს, თუმცა მისი დადებითი ეფექტები (სისხლის მიმოქცევის გაუმჯობესება და შეშუპების კლება) ვიზუალურად აუმჯობესებს კანის სტრუქტურას.

„მაგნიუმი ერთ-ერთი ყველაზე მნიშვნელოვანი მინერალია ორგანიზმისთვის, განსაკუთრებით ნერვული სისტემის, კუნთების და ენერგიის წარმოებისთვის.

ამ ბოლო დროს სოციალურ ქსელებში ალაპარაკდნენ მაგნიუმზე, როგორც ცელულიტის მოშორების საშუალებაზე. მაგნიუმი ცელულიტს პირდაპირ, რა თქმა უნდა, არ აქრობს, მაგრამ ის:

აუმჯობესებს სისხლის მიმოქცევას;

ამცირებს მსუბუქ შეშუპებას;

აუმჯობესებს მიკროცირკულაციას;

ხელს უწყობს კუნთების აღდგენას.

შედეგად, კანი უფრო გლუვი ჩანს და ცელულიტიც ნაკლებად შესამჩნევია.

მაგნიუმით მდიდარი პროდუქტებია: ავოკადო, ისპანახი, ბანანი, გოგრის თესლი, ნუში, შავი, მაღალპროცენტიანი შოკოლადი,“ - ამბობს ნუტრიციოლოგი.