მჯდომარე სამუშაო და ზურგის ტკივილი - 3 მარტივი ერგონომიკული წესი ოფისისთვის, რომელსაც ყოველდღე არღვევთ

ბევრი ადამიანი, დღეში 8-10 საათს კომპიუტერთან ატარებს. დღის ბოლოს კი ხშირად გვაწუხებს კისრის დაჭიმულობა, მხრების ტკივილი, წელის დისკომფორტი და მუდმივი დაღლილობის შეგრძნება.
უმეტეს შემთხვევაში პრობლემა არც ასაკია და არც ფიზიკური დატვირთვა. მიზეზი შეიძლება ერთი შეხედვით უმნიშვნელო დეტალები იყოს - არასწორ სიმაღლეზე განთავსებული მონიტორი, მოუხერხებელი სკამი ან საათობით ერთ პოზაში ჯდომა.

სპეციალისტები ამბობენ, რომ ზურგის ტკივილის პრევენცია, ხშირად რთულ მკურნალობაში კი არა, სამუშაო გარემოს სწორად მოწყობასა და რამდენიმე მარტივი ჩვევის შეცვლაში მდგომარეობს.

რა ჩვევები უნდა გამოიმუშაოს ადამიანმა, რომ ყოველდღიური რუტინის მიუხედავად, დღის ბოლოს, თავს ნაკლებად დატვირთულად გრძნობდეს?
ამ კითხვებით zmna.ge ექიმ-რეაბილიტოლოგს, ეკა ღვინჯილიას დაუკავშირდა.

„

"როდესაც პაციენტები მეუბნებიან, რომ საღამოს კისერი და ზურგი სტკივათ, პირველ რიგში ყოველთვის ერთსა და იმავე კითხვას ვუსვამ - როგორ ატარებთ სამუშაო დღეს?

ბევრი ელოდება, რომ ტკივილის მიზეზი დისკის თიაქარი, ოსტეოქონდროზი ან სხვა რომელიმე სერიოზული პრობლემა იქნება, თუმცა ძალიან ხშირად, მიზეზი გაცილებით მარტივია.

ჩვენი სხეული მოძრაობისთვის არის შექმნილი. თანამედროვე სამუშაო გარემო კი გვაიძულებს, საათობით ერთ პოზიციაში ვიყოთ. შედეგად, კუნთები მუდმივად დაძაბულია, სახსრები ზედმეტ დატვირთვას იღებს და დღის ბოლოს ჩნდება ტკივილი, რომელსაც ბევრი უკვე ჩვეულებრივ მოვლენად აღიქვამს.
ოფისში მომუშავე ადამიანების უმეტესობა, ყოველდღიურად არღვევს რამდენიმე მარტივ ერგონომიკულ წესს, რომლებიც ზურგისა და კისრის ჯანმრთელობისთვის კრიტიკულად მნიშვნელოვანია.
სამი ყველაზე გავრცელებული შეცდომა, რომელსაც ჩემს პაციენტებში ყველაზე ხშირად ვხვდები ეს არის ეკრანისკენ დახრილი თავი, ზურგის არასათანადო მხარდაჭერა და საათობით გაუნძრევლად ჯდომა.

შეცდომა 1 - ეკრანისკენ მუდმივად დახრა
ზოგჯერ ვერც კი ვამჩნევთ, რომ მუშაობისას, თავი რამდენიმე სანტიმეტრით წინ გვაქვს წაწეული. ეს პოზიცია კისრის კუნთებს დამატებით დატვირთვას აკისრებს და ხშირად ძლიერი დაჭიმულობისა და ტკივილის მიზეზი ხდება.

შეეცადეთ მონიტორის ზედა ნაწილი თვალის დონეზე მდებარეობდეს, ხოლო ეკრანი თქვენგან დაახლოებით ხელის სიგრძის მანძილზე იყოს განთავსებული.

შეცდომა 2 - სკამის საზურგის იგნორირება

ხშირად ადამიანები სკამის კიდეზე სხედან, წინ იხრებიან ან ნახევრად მოხრილ პოზაში მუშაობენ. ასეთ დროს ხერხემალი ბუნებრივ საყრდენს კარგავს და დატვირთვა წელის არეზე გადადის.

შეეცადეთ, ზურგი მთლიანად საზურგეს ეყრდნობოდეს და წელი ნაკლებად დაიტვირთოს.

შეცდომა 3 - საათობით გაუნძრევლად ჯდომა

ზოგჯერ ფიქრობენ, რომ კარგი სკამი პრობლემის მოგვარების საუკეთესო გზაა. სინამდვილეში ყველაზე ერგონომიკული სამუშაო ადგილიც ვერ ანაზღაურებს რამდენიმე საათის განმავლობაში ერთ პოზაში ყოფნას.

რაც უნდა მოხერხებულად ისხდეთ, შეეცადეთ ყოველ 30-60 წუთში ერთხელ,ადგეთ და გაიარ-გამოიაროთ. სასურველია რამდენიმეწუთიანი მსუბუქი ვარჯიში ან გაჭიმვა.

ასეთ მცირე ჩვევით ცვლილებებს, თქვენი დისკომფორტის მნიშვნელოვნად შემცირება შეუძლია. მიაქციეთ ყურადღება ჩვევებს და შეუქმენით კომფორტი საკუთარ თავს,"- გვირჩევს ეკა ღვინჯილია.