"ნემსი სიმსივნეს გააღიზიანებს და კიბოს მთელ ორგანიზმში გაავრცელებს" - მითები და სინამდვილე ბიოფსიის შესახებ

ბევრ ადამიანს დღემდე სჯერა, რომ ბიოფსია „სიმსივნეს აღვიძებს“ ან დაავადების გავრცელებას იწვევს. სწორედ ამიტომ, ხშირად, როცა ექიმი ამ პროცედურას ნიშნავს, პაციენტს შიში უჩნდება.
რა არის რეალურად ბიოფსია, რამდენად უსაფრთხოა პროცედურა და რომელი გავრცელებული შეხედულებებია მხოლოდ მითი? - ამ კითხვებზე ონკოლოგი კახაბერ ბარამიძე პასუხობს.

"მოდით, დავამსხვრიოთ ერთ-ერთი ყველაზე საშიში სამედიცინო მითი, რომელიც დღემდე ადამიანების სიცოცხლეს საფრთხეში აგდებს!

გაგიგიათ ფრაზა: "-არ გაიკეთო ბიოფსია, ნემსი სიმსივნეს გააღიზიანებს და კიბოს უჯრედებს მთელ ორგანიზმში გაავრცელებს!"

დაივიწყეთ - ეს არის სრული მითი მსოფლიოს წამყვანი ონკოლოგები და თანამედროვე მედიცინა ერთხმად ამბობენ: არ არსებობს არცერთი სამეცნიერო მტკიცებულება, რომ სწორად ჩატარებული ბიოფსია კიბოს ავრცელებს! პირიქით — ამ მითის დაჯერება და ექიმთან ვიზიტის გადადება არის ის, რაც რეალურად გვაკარგვინებს ძვირფას დროს!

რატომ არის ბიოფსია აბსოლუტურად უსაფრთხო და რატომ არ ავრცელებს სიმსივნეს?

ისტორიულად ეს შიში ძველ, დაუხვეწავ ინსტრუმენტებს უკავშირდებოდა. დღეს კი ძუძუს ბიოფსია სრულდება ულტრათანამედროვე, ჭკვიანი ტექნოლოგიებით, რომლებიც ქსოვილის უსაფრთხოებას უმაღლეს დონეზე იცავს.

თანამედროვე მამოლოგიაში ჩვენ ვიყენებთ ქორ-ბიოფსიას (Core Needle) და ვაკუუმ-ასისტირებულ (VAB) ბიოფსიას.

როგორ მუშაობს "დაცვის მექანიზმი"?

პროცედურის დროს ხშირად გამოიყენება ე.წ. კოაქსიალური ნემსი. მარტივად რომ ვთქვათ, ეს არის "მილი მილში" პრინციპი. ჯერ ძუძუს ქსოვილში შედის დამცავი, იზოლირებული გარე მილი და მხოლოდ მის შიგნით მოძრაობს ის წვრილი ნემსი, რომელიც იღებს საეჭვო ნიმუშს. როდესაც ნიმუში გარეთ გამოგვაქვს, ის საერთოდ არ ეხება ჯანსაღ ქსოვილებს — ის უსაფრთხოდ არის მოთავსებული დამცავ მილში! ვაკუუმ-ბიოფსიის დროს კი, აპარატი თავად ისრუტავს მასალას დახურულ სისტემაში.
შესაბამისად, უჯრედების მექანიკური გავრცელების შანსი ფიზიკურად ნულის ტოლია!

რატომ არის ბიოფსია ჩვენი მთავარი იარაღი?
• ის "კითხულობს" სიმსივნის პასპორტს: მხოლოდ ბიოფსიას შეუძლია ზუსტად გვითხრას, რა ტიპის უჯრედებთან გვაქვს საქმე და როგორია მისი ბიოლოგიური „ხასიათი“.
• გვიცავს არასაჭირო ოპერაციებისგან: თუ წარმონაქმნი კეთილთვისებიანია (რაც ძალიან ხშირად ხდება!), ბიოფსია გვიცავს ზედმეტი და ტრავმული ქირურგიული ჩარევისგან.
• ნიშნავს ზუსტ მკურნალობას: დღეს კიბოს შაბლონურად აღარ ვმკურნალობთ! ბიოფსიის პასუხი ექიმს ეუბნება, კონკრეტულად რომელი წამალი (ტარგეტული, ჰორმონალური თუ ქიმიოთერაპია) იმუშავებს ზუსტად თქვენს ინდივიდუალურ შემთხვევაზე.

დაიმახსოვრეთ, ძუძუს ბიოფსია არის ნაბიჯი სიცხადისკენ, რომელიც შიშს — ზუსტ დიაგნოზად, ხოლო დაავადებას — მართვად პროცესად აქცევს!
დროული დიაგნოზი = გადარჩენილ სიცოცხლეს!" - განმარტავს ექიმი.