ოქროს 11 წუთი - როგორ იცავს დამატებითი ძილი ჩვენს გულს?

ბევრისთვის ძილი ფუფუნებაა, რომლის ხანგრძლივობის განსაზღვრაც, ჩვენი ცხოვრების წესიდან გამომდინარე გვიწევს.
თუმცა, ჟურნალ European Journal of Preventive Cardiology-ში გამოქვეყნებული უახლესი კვლევის მიხედვით, გულის ჯანმრთელობის გასაუმჯობესებლად, ცხოვრების წესის სრულად შეცვლა სულაც არ არის საჭირო.
საკმარისია, ყოველ ღამე ძილის ხანგრძლივობას სულ რაღაც 11 წუთი დავამატოთ.

კვლევამ, რომელიც ათასობით ადამიანზე დაკვირვებას ეყრდნობოდა, აჩვენა, რომ ძილის ხანგრძლივობასა და გულის შეტევის (ინფარქტის) რისკს შორის პირდაპირი კავშირია.
მეცნიერებმა დაადგინეს, რომ მათ, ვინც მოახერხა ძილის დროის მცირედით (დაახლოებით 11 წუთით) გაზრდა, გულ-სისხლძარღვთა დაავადებების განვითარების ალბათობა საგრძნობლად შეუმცირდათ.
ერთი შეხედვით, 11 წუთი ძალიან მცირე დროა, თუმცა ბიოლოგიურ დონეზე დროის ფაქტორი მნიშვნელოვან როლს თამაშობს.

ძილის 11 წუთით გახანგრძლივება იწვევს:

არტერიული წნევის სტაბილიზაციას

ძილის დროს ჩვენი სხეული ბუნებრივად ამცირებს წნევას. დამატებითი დრო გულს აძლევს საშუალებას, უფრო დიდხანს იმუშაოს „ეკონომ-რეჟიმში“.

ანთებითი პროცესების შემცირებას

ქრონიკული უძილობა ორგანიზმში იწვევს C რეაქტიული ცილის მატებას, რაც არტერიების დაზიანების წინაპირობაა. მცირე დამატებითი დასვენებაც კი ეხმარება სხეულს ამ ცილების დონის დარეგულირებაში.

სტრესის ჰორმონების კონტროლს

კორტიზოლის დონე, რომელიც გულზე დიდ დატვირთვას ახდენს, ძილის ბოლო ფაზებში ყველაზე ეფექტურად ბალანსდება.
კვლევის ავტორები აღნიშნავენ, რომ მთავარია არა მხოლოდ ძილის რაოდენობა, არამედ თანმიმდევრულობა.

ეს აღმოჩენა ამსხვრევს მითს იმის შესახებ, რომ ჯანმრთელობისთვის მხოლოდ 8-საათიანი უწყვეტი ძილია მისაღები. თუ აქამდე 6 ან 7 საათი გეძინათ, ნუ ეცდებით რეჟიმის მკვეთრ შეცვლას, შეეცადეთ ძილის ხანგრძლივობა სულ რაღაც 11 წუთით გაზარდოთ.