"ორჯერ დაბადებული" - როგორ გადაარჩინეს მუცლადმყოფი ჩვილი უიშვიათესი სინდრომისგან

"ორჯერ დაბადება" - ასე უწოდა მედიამ მოვლენას, რომელიც ფლორიდაში, კერძოდ ორლანდოში მდებარე წამყვან კლინიკაში განვითარდა.

ექიმებმა ნამდვილი სამედიცინო სასწაული მოახდინეს, როდესაც 25 კვირის ნაყოფი საშვილოსნოდან ნაწილობრივ ამოიყვანეს, სასწრაფო ოპერაცია ჩაუტარეს და შემდეგ ისევ დედის ორგანიზმში დააბრუნეს.

ფლორიდაში მცხოვრები ჟუბერების ოჯახისთვის ორსულობის მე-19 კვირა ნამდვილ კოშმარად იქცა. გეგმური ულტრაბგერითი კვლევის დროს ექიმებმა ნაყოფს უმძიმესი და უიშვიათესი დიაგნოზი დაუსვეს - სასუნთქი გზების თანდაყოლილი ბლოკირება. ეს არის მდგომარეობა, როდესაც ბავშვის სასუნთქი გზები სრულად არის ჩაკეტილი, რაც შემთხვევათა უმრავლესობაში ფატალურად სრულდება, რადგან დაბადების შემდეგ პატარას სუნთქვა არ შეუძლია.

სასოწარკვეთილ მშობლებს ქირურგებმა უპრეცედენტო და მაღალტექნოლოგიური გეგმა შესთავაზეს, რომელსაც მოგვიანებით მედიამ „ბავშვის ორჯერ დაბადება“ უწოდა.

ქირურგებმა გაკვეთეს საშვილოსნო და იქიდან ფრთხილად ამოიყვანეს მხოლოდ ბავშვის თავი და ხელები. ნაყოფის დანარჩენი სხეული საშვილოსნოს შიგნით დარჩა. ეს კრიტიკულად მნიშვნელოვანი იყო, რათა პლაცენტას არ შეეწყვიტა მუშაობა და ბავშვს დედისგან ჟანგბადი მიეღო, სანამ ფილტვები არ მუშაობდა. ამ პოზიციაში მყოფ ჩვილს ქირურგებმა რამდენიმე წუთში გაუხსნეს დაბლოკილი სასუნთქი გზები და სპეციალური მილი ჩაუდგეს. როდესაც სასუნთქი გზების გამავლობა აღდგა, ექიმებმა პატარა კასიანი უკან, საშვილოსნოში დააბრუნეს, სანაყოფე სითხე სპეციალური ხსნარით შეავსეს და მუცელი გაკერეს.

„ეს იყო ოპერაცია, სადაც ყოველი წამი ოქროს ფასად ფასობდა. ჩვენ უნდა გვემუშავა საოცარი სიზუსტით, რათა პლაცენტური სისხლის მიმოქცევა არ დარღვეულიყო,“ - აღნიშნავენ ქირურგები.

ოპერაციამ წარმატებით ჩაიარა. ბავშვმა დედის მუცელში კიდევ ექვსი კვირა გაატარა, რაც მისი განვითარებისთვის სასიცოცხლოდ მნიშვნელოვანი იყო. ექვსი კვირის შემდეგ კი, პატარა კასიანი ქვეყანას უკვე მეორედ მოევლინა, ამჯერად ბუნებრივი მშობიარობის გზით. დაბადების შემდეგ ახალშობილთა რეანიმაციულ განყოფილებაში გატარებული 4-თვიანი მძიმე და ინტენსიური რეაბილიტაციის კურსის, მრავალი პროცედურისა და ექიმების დაუღალავი შრომის შემდეგ, პატარა კასიანი უკვე სრულიად ჯანმრთელია და თავის ოჯახთან ერთად სახლში იმყოფება.

წყარო: MedicalXpress / The Independent