ფრინველი, რომელიც მიწას თითქმის არასოდეს ეხება

იცოდით, რომ ბუნებაში არსებობს ფრინველი, რომელიც მიწაზე თითქმის არასოდეს ეშვება? მას ფრენისას სძინავს, ფრენისას ჭამს და ზოგჯერ თვეების განმავლობაში საერთოდ არ ეშვება მიწაზე.

ფრინველს ნამგალა ჰქვია და ის საქართველოშიც გვხვდება. ნამგალა ზომით პატარა ფრინველებია. მისი მასა 50 გრამს აღწევს. აქვთ გრძელი და ვიწრო, ნამგლისებური ფრთები და მოკლე, სუსტი ფეხები.

ფრინველის ლათინური სახელწოდება Apus apus სიტყვასიტყვით ასე ითარგმნება - „ფეხების გარეშე“. სინამდვილეში ფრინველს ფეხები აქვს, მაგრამ იმდენად მოკლე, რომ მიწაზე სიარული თითქმის არ შეუძლია.

ახალგაზრდა ნამგალას ბუდიდან გაფრენის შემდეგ, შეუძლია 6–10 თვე უწყვეტად დარჩეს ჰაერში. ის ფრენისას იჭერს მწერებს, ჰაერში სვამს წვიმის წვეთებს და, რაც ყველაზე საოცარია ცაში სძინავს. ამისათვის ნამგალა ე.წ. „ნახევრად მძინარე ტვინის“ მექანიზმს იყენებს. მისი ტვინის ერთი ნაწილი ისვენებს, მეორე კი აკონტროლებს ფრენას. ასე ახერხებს, რომ არ ჩამოვარდეს და მიმართულებაც შეინარჩუნოს.

ცაში ნამგალა თავს უსაფრთხოდ გრძნობს, მიწაზე დაშვება კი მისთვის გარკვეულ რისკებთანაა დაკავშირებული. რადგანაც ფრთები გრძელი და ძლიერი აქვს, მაგრამ ფეხები - სუსტი. მიწაზე დაშვების შემდეგ, მას შესაძლოა აფრენა გაუჭირდეს.

როგორც მეცნიერები ამბობენ, რომ ნამგალა ერთ-ერთი საუკეთესო მაგალითია იმისა, თუ როგორ შეიძლება ორგანიზმი სრულად მოერგოს ერთ გარემოს - ჰაერს. ცა ამ ფრინველისთვის არ არის უბრალოდ სივრცე.ის მისი სახლი და ცხოვრების გზაა.