რატომ ჩნდება აკნეს ნაწიბურები და რა ზრდის მათი განვითარების რისკს? - დერმატოლოგი ნანა ადამია

აკნე მხოლოდ დროებითი კოსმეტიკური პრობლემა არ არის. ბევრისთვის ყველაზე რთული ეტაპი მაშინ იწყება, როდესაც გამონაყარი ქრება, მაგრამ მის კვალს კანი წლების განმავლობაში ინახავს.
აკნეს შემდეგ დარჩენილი ნაწიბურები არა მხოლოდ გარეგნობაზე, არამედ თვითშეფასებაზეც ახდენს გავლენას და მათი კორექცია ხშირად გაცილებით რთულია, ვიდრე თავად აკნეს მკურნალობა. სწორედ ამიტომ დერმატოლოგები ხაზს უსვამენ, რომ აკნეს დროს მთავარი მიზანი მხოლოდ გამონაყარის შემცირება არ არის. არანაკლებ მნიშვნელოვანია ანთების დროული კონტროლი და კანის დაცვა, რათა ნაწიბურების წარმოქმნა თავიდან ავიცილოთ.

როგორ ჩნდება აკნეს ნაწიბურები და რა ზრდის მათი განვითარების რისკს? ამ კითხვებზე დერმატოლოგი ნანა ადამია საუბრობს.

"აკნეს ნაწიბურები ჩნდება მაშინ, როდესაც ანთება კანის ღრმა ფენებს აზიანებს და კოლაგენის სტრუქტურას არღვევს. პრობლემა მხოლოდ გამონაყარი არ არის, მთავარი საფრთხე ხანგრძლივი და ძლიერი ანთებაა. თუ კანი დაზიანებულ ქსოვილს სრულყოფილად ვერ აღადგენს, შეიძლება დარჩეს ჩაღრმავებული ან ამობურცული ნაწიბურები.

გამონაყარის ხელით წვალება და დაზიანება მნიშვნელოვნად ზრდის ნაწიბურების წარმოქმნის რისკს. ამიტომ აკნეს მკურნალობის მთავარი მიზანი არა მხოლოდ გამონაყარის შემცირება, არამედ ანთების დროული კონტროლი და კანის დაცვაა," - ამბობს ექიმი.