რატომ უნდა ეძინოს ბავშვს 9-10 საათის განმავლობაში? - ენდოკრინოლოგი ვაჟა ვაჭარაძის რჩევა მშობლებს

მოზარდის ზრდისა და განვითარებისთვის, ძილი აუცილებელია.

ბავშვების ძილის რეჟიმი უფროსების რეჟიმისგან მნიშვნელოვნად განსხვავდება და ამას თავისი მიზეზები აქვს.

რატომ არის აუცილებელი ბავშვისთვის მინიმუმ 9-10 საათი ძილი და რა უნდა გაითვალისწინოს მშობელმა? zmna.ge-ს კითხვებს ენდოკრინოლოგმა ვაჟა ვაჭარაძემ უპასუხა.

„ბავშვთა ასაკში ძილის ხანგრძლივობა განსაკუთრებულად მნიშვნელოვანია.

10 წლამდე ბავშვს მინიმუმ 9-10 საათი უნდა ეძინოს. 13 წლიდან ასაკის მოზარდს კი 7-9 საათამდე.

ზრდის ჰორმონი, რომელიც მხოლოდ ძილის დროს გამომუშავდება, ბავშვის ძვლოვანი და ხრტილოვანი სისტემის გარდა, ორგანოების ჩამოყალიბებაზე ახდენს გავლენას.

მნიშვნელოვანია ძილის ფაზების გათვალისწინებაც. ბავშვს ჰარმონიულად უნდა ეძინოს, რადგან ნელი ძილის ფაზაში ზრდის ჰორმონი გამომუშავდება, სწრაფი ძილის დროს კი კორტიზოლი, რაც სტრესთან გამკლავებაში ეხმარება და ტესტოსტერონი, რაც პუბერტატის ასაკში განსაკუთრებით მნიშვნელოვანია,“ - ამბობს ექიმი.