როდის გავიხეხოთ კბილები? - ყავის დალევამდე თუ შემდეგ - შეცდომა, რომელსაც შესაძლოა ყოველდღე უშვებდე

როდის გავიხეხოთ კბილები? - ყავის დალევამდე თუ შემდეგ - შეცდომა, რომელსაც შესაძლოა ყოველდღე უშვებდე

დილა ბევრისთვის ყავით იწყება, შემდეგ კი დილის რუტინის მიხედვით კბილებს ვიხეხავთ. ერთი შეხედვით, ეს სრულიად ლოგიკური ჩვევაა - დავლიეთ ყავა და გვინდა, კბილებზე დარჩენილი ფერი, გემო და ნადები მაშინვე მოვიშოროთ.

თუმცა სტომატოლოგების რეკომენდაციით, ყავის მიღებისთანავე კბილების გახეხვა ყოველთვის საუკეთესო გადაწყვეტილება არ არის.

საქმე ისაა, რომ ყავა მჟავიან სასმელებს მიეკუთვნება. მისი მიღების შემდეგ პირის ღრუში მჟავიანობა დროებით იმატებს, კბილის მინანქარი კი ამ დროს უფრო მგრძნობიარე ხდება. თუ ამ მომენტში კბილებს ჯაგრისით ძლიერად გავიხეხავთ, შესაძლოა, დროთა განმავლობაში მინანქრის ცვეთას შევუწყოთ ხელი, განსაკუთრებით მაშინ, თუ ეს ყოველდღიურ ჩვევად გვაქვს ქცეული.

პროფესიონალები ამბობენ, რომ უკეთესია, კბილები ყავის დალევამდე გავიხეხოთ. მაშინ, როცა კბილის ზედაპირი ნადებისგან გასუფთავებულია, ყავის პიგმენტებს ნაკლები „მოსაჭიდი“ აქვს და ლაქებიც უფრო რთულად ჩნდება.

ეს განსაკუთრებით მნიშვნელოვანია მათთვის, ვინც ყავას ყოველდღე სვამს და კბილების ფერის ცვლილებას ამჩნევს.

ყავის შემდეგ კი საუკეთესო ნაბიჯი წყლის გამოვლებაა. წყალი ეხმარება პირის ღრუს, ნაწილობრივ ჩამორეცხოს მჟავები და ფერის მიმცემი პიგმენტები. ამის შემდეგ საქმეში ნერწყვიც ერთვება. ის ბუნებრივად აბალანსებს მჟავიანობას და იცავს კბილის ზედაპირს. თუ კბილების გახეხვა მაინც ყავის შემდეგ გირჩევნიათ, უმჯობესია, დაახლოებით 30 წუთი მოიცადოთ. ამ დროის განმავლობაში პირის ღრუში მჟავიანობა შედარებით მცირდება და მინანქარიც ნაკლებად მგრძნობიარე ხდება.

რჩევები მხოლოდ ყავას არ ეხება. American Dental Association-ის რეკომენდაციით, მჟავე საკვების ან სასმლის შემდეგ კბილების გახეხვამდე მოცდა უკეთესი არჩევანია. ხოლო კბილების შეფერილობის პრევენციისთვის, ყავის, ჩაისა და სხვა პიგმენტიანი სასმელების დალევის შემდეგ პირი წყლით გამოვირეცხოთ.