როგორ დავანებოთ თავი მოწევას? - 7-დღიანი პრაქტიკული გეგმა ფსიქოლოგისგან

მოწევისთვის თავის დანებება, მხოლოდ „ნებისყოფის გამოცდა“ არ არის. სინამდვილეში ეს ბევრად უფრო რთული პროცესია. ჩვევა, სხეულის დამოკიდებულება, ემოციური ფონი და ყოველდღიური რიტუალები ერთმანეთშია გადახლართული. სწორედ ამიტომ, სიგარეტზე უარის თქმა მხოლოდ ერთი გადაწყვეტილებით იშვიათად მთავრდება.

ადამიანს სჭირდება არა თვითკრიტიკა და დანაშაულის განცდა, არამედ სწორად დაგეგმილი ნაბიჯები, მხარდაჭერა და იმის გააზრება, რა მომენტებში ხდება მოწევის სურვილი ყველაზე ძლიერი.

ფსიქოლოგები ამბობენ, რომ დამოკიდებულებასთან ბრძოლაში ყველაზე მნიშვნელოვანი საკუთარ თავთან გულწრფელი, მაგრამ არა მკაცრი დამოკიდებულებაა. როგორ დავანებოთ თავი მოწევას ისე, რომ პროცესი ნაკლებად მტკივნეული იყოს?
გთავაზობთ ფსიქოლოგ ნინი დგებუაძის პრაქტიკულ რჩევებს მათთვის, ვისაც სიგარეტის მოწევისთვის თავის დანებება ნამდვილად აქვს განზრახული.

"როგორ დავანებოთ თავი მოწევას სხეულისა და გონების გათვალისწინებით?

მავნე ჩვევებთან ბრძოლას მხოლოდ ნებისყოფით ვცდილობთ, რაც ხშირად მარცხით სრულდება. რეალური ცვლილება მაშინ იწყება, როდესაც პროცესს სტრატეგიულად, საკუთარ ტრიგერებზე დაკვირვებითა და სხეულის ფიზიოლოგიის გაგებით ვუდგებით.

გთავაზობთ 7-დღიან პრაქტიკულ გეგმას, რომელიც დაგეხმარებათ არა უბრალოდ „გაუძლოთ“, არამედ გააზრებულად დაემშვიდობოთ ამ ჩვევას:

1 დღე: თვითდაკვირვება. ჯერ არაფერს ვცვლით. უბრალოდ ჩაინიშნეთ ყოველი ღერი: როდის და რატომ? დილის ყავა? სტრესი? ამით თქვენი პირადი „ტრიგერების რუკას“ ადგენთ.

2 დღე: პირველი მცირე გამარჯვება.
ამოაგდეთ ის 3 ღერი, რომლებიც ყველაზე ნაკლებად გჭირდებათ (მაგალითად, ავტომატურად ან მოწყენილობისას მოწეული). ტვინი ეჩვევა, რომ ყოველ იმპულსს სიგარეტი არ სჭირდება.

3 დღე: 90 წამის წესი. როცა მოწევის სურვილი მოგაწვებათ, ჩართეთ წამზომი. სურვილი პიკს 90 წამში აღწევს და შემდეგ ქრება. ამ პროცესზე დაკვირვება შინაგანად ბევრ რამეს ცვლის.

4 დღე: გადამწყვეტი ნაბიჯი.
ეს არის თავის დანებების დღე. თქვენ უკვე იცით თქვენი ტრიგერები და იცით, რომ „მოთხოვნილება“ მხოლოდ პირველი 72 საათია რთული.

5 დღე: ფიზიკური გათავისუფლება. ყოველი გაძლებული წუთი ნიშნავს, რომ ფიზიკური დამოკიდებულება სუსტდება. გამოიყენეთ ცივი წყალი ან მოკლე გასეირნება სურვილის გადასატანად.

6 დღე: ჩვევა და საჭიროება. ნიკოტინი ორგანიზმიდან გამოსულია. ამ ეტაპზე მთავარი გამოწვევა ფსიქოლოგიური ჩვევაა. იყავით ფხიზლად და არ მოტყუვდეთ ზედმეტი თავდაჯერებულობით.

7 დღე: მომავლის დაზღვევა. ტვინი შეეცდება წარსულის გაფერადებას „არც ისე მავნეა“. თქვენი ჩანაწერების ჟურნალი კი შეგახსენებთ რეალობას.

დაიმახსოვრეთ: თავის დანებება არ არის მხოლოდ ნიკოტინზე უარის თქმა, ეს არის საკუთარი სხეულის მოსმენისა და ახალი, ჯანსაღი რეაქციების სწავლის პროცესი," - გვირჩევს ფსიქოლოგი.