როგორ დავიცვათ პატარები მზის მავნე სხივებისგან? - დერმატოლოგი გვირჩევს

ბავშვის ნაზი და მგრძნობიარე კანის დაცვა მზის მავნე სხივებისგან, ნებისმიერი მშობლისთვის პრიორიტეტია. თუმცა, აფთიაქებისა თუ მაღაზიების თაროებზე მზისგან დამცავი საშუალებების (SPF) მრავალფეროვნება ხშირად გვაბნევს.

წარწერები „Baby“ ან „Kids“ მზისგან დამცავ პროდუქტებზე, ავტომატურად გვანიშნებს, რომ პროდუქტი ბავშვებისთვისაა განკუთვნილი და მომხმარებელი ფიქრობს, რომ ის უსაფრთხოა...

მაგრამ რას ნიშნავს ეს წარწერა სინამდვილეში? უსაფრთხოების გარანტია თუ უბრალოდ მარკეტინგული ხრიკი?

დერმატოლოგმა ნინო ორახელაშვილმა zmna.ge-ს მკითხველისთვის უმნიშვნელოვანეს რჩევები გაგვიზიარა იმასთან დაკავშირებით, თუ როგორ უნდა შევარჩიოთ SPF სწორად, რატომ უნდა ვთქვათ უარი ქიმიურ ფილტრებზე და რა სამი ოქროს წესი უნდა დავიცვათ პატარების მზისგან დასაცავად.

„ბავშვისთვის მზისგან დამცავი პროდუქტის შერჩევისას, ბევრი დედა ცდება, თქვენც არ დაუშვათ ეს შეცდომა!

მე, როგორც დერმატოლოგმა უნდა გითხრათ, რომ წარწერა „Baby“ და „Kids“ ბოთლის წინა მხარეს, ხშირად მარკეტინგული ხრიკია.

საქმე ისაა, რომ ბავშვის ნაზი კანისთვის ქიმიური ფილტრების გამოყენება არ შეიძლება. მათ ალერგიის გამოწვევა შეუძლიათ. ბავშვს სჭირდება მხოლოდ მინერალური დამცავი, რომელიც შეიცავს თუთიის ოქსიდს ან ტიტანიუმის დიოქსიდს.

დაიმახსოვრეთ სამი მთავარი წესი:

პირველი: 6 თვემდე ჩვილებს SPF-ს საერთოდ არ ვუსვამთ! მხოლოდ ჩრდილი, ქუდი და ტანსაცმელი.

მეორე: SPF 30 სავსებით საკმარისია. ის მზის სხივების 97%-ს ბლოკავს. მთავარია, სწორად წაუსვათ კანზე.

მესამე: მაისური არ იცავს მზის სხივებისგან! სველი თეთრი მაისურის დაცვა მხოლოდ SPF 5-ია, მზეში მის ქვეშ მაინც ატანს.

და კიდევ ერთი: მინერალური SPF-ი წყლით არ ჩამოიბანება, საღამოს ბავშვს ტანი, სპეციალური საბავშვო დასაბანი გელით უნდა ჩამოჰბანოთ," - გვირჩევს ექიმი.