როგორ გაჩნდა გამოთქმა პანიკური შიში?

პანიკა მედიცინასა და ფსიქოლოგიაში მიღებული ტერმინია, ხოლო პანიკური შეტევა შიშისა და შფოთვის განცდაა, რომელიც შეიძლება მოულოდნელად დაეუფლოს ადამიანს.

ამგვარი შეგრძნებით პასუხობს ადამიანის ორგანიზმი და ფსიქიკა, ცხოვრებაში მიმდინარე არასასიამოვნო მოვლენებსა და სტრესს.

„პანიკაში ჩავვარდი“, „პანიკურმა შიშმა შემომიტია“, „პანიკამ მომიცვა“ -ეს ფრაზები გონებაში მაშინვე განგაშის, შიშის, საფრთხის ასოციაციას იწვევს. არადა, პანიკა, იგივე პანი, ბერძნულ მითოლოგიაში ტყეებისა და ჭალების ღვთაებაა, არც ისე საშიში და მხიარულიც კი.

ბერძნების წარმოდგენით პანი მხიარული ღმერთი იყო, იგი დაეხეტებოდა მთებსა და ტყეებში, უკრავდა თავისსავე გამოგონილ სალამურზე და ცეკვავდა ნიმფებთან ერთად. როდესაც პანი შუადღისით იძინებდა, მასთან ერთად იძინებდა ბუნებაც. ეს სიჩუმე წმინდა იყო და ვერავინ ბედავდა მის დარღვევას, ხოლო თუ ვინმე დაარღვევდა სიჩუმეს ან შეაწუხებდა პანს მარტო ყოფნისას, პანი საშინელ ყვირილს ატეხდა და სიმყუდროვის დამრღვევს "პანიკურ შიშს" ჰგვრიდა.

სწორედ აქედან მოდის გამოთქმა პანიკური შიში, რომელიც სამედიცინო ტერმინად და ადამიანის ფსიქოლოგიური მდგომარეობის აღწერად იქცა.