გაყინული საკვები პროდუქტები, ჩვენს ყოველდღიურ რაციონში უფრო და უფრო მეტ ადგილს იკავებს. რა შეცდომებს ვუშვებთ ყველაზე ხშირად პროდუქტის გალღობისას და მოხმარების დროს და რა აუცილებელი წესების გათვალისწინებაა საჭირო?სურსათის უვნებლობის სპეციალისტი ირაკლი არაბული გვირჩევს.
ქათმის ფილეს გალღობის ორი უსაფრთხო მეთოდი:
1. გალღობა მაცივარში (ყველაზე უსაფრთხო მეთოდი)
- გამოიღეთ პროდუქტი საყინულიდან და მოათავსეთ მაცივრის ქვედა თაროზე (პლუს განყოფილებაში).
- სასურველია პროდუქტი იდოს ჭურჭელში, რომელსაც აქვს ბადე/საწური, რათა გალღობისას გამოყოფილი სითხე პროდუქტს არ ეხებოდეს.
- ეს მეთოდი ყველაზე ნელია, თუმცა ყველაზე უსაფრთხოა ადამიანის ჯანმრთელობისთვის.
2. გალღობა ცივი გამდინარე წყლის ქვეშ
- თუ პროდუქტის სწრაფად გალღობა გჭირდებათ, შეგიძლიათ გამოიყენოთ ცივი გამდინარე წყალი.
- მნიშვნელოვანია: პროდუქტი უნდა იყოს თავის პირველად შეფუთვაში (პაკეტში), რათა წყალი უშუალოდ ხორცს არ შეეხოს.
რა არ უნდა გავაკეთოთ არავითარ შემთხვევაში?
- ოთახის ტემპერატურაზე დატოვება: კატეგორიულად აკრძალულია პროდუქტის დატოვება მაგიდაზე გასალღობად.
- თბილი ან ცხელი წყალი: არ შეიძლება პროდუქტის თბილ წყალში მოთავსება. რატომ? ოთახის ტემპერატურაზე ან თბილ წყალში ბაქტერიები ძალიან სწრაფად მრავლდებიან, რამაც შეიძლება მოწამვლა გამოიწვიოს," - გვირჩევს ირაკლი არაბული.
