როგორ გავზარდოთ ბედნიერი შვილი? - ფსიქოლოგი ნანა ფიფია პირადი მაგალითის შესახებ

ბავშვის აღზრდაზე საუბრისას, ხშირად გვგონია, რომ მთავარი მხოლოდ სიტყვები, მითითებები, შენიშვნები და რჩევებია. თუმცა ფსიქოლოგები ამბობენ, რომ ბავშვები ყველაზე მეტად სწორედ ჩვენს ყოველდღიურ ქცევებს, ემოციებსა და ცხოვრების წესს „კითხულობენ“.

ისინი იმახსოვრებენ არა მხოლოდ იმას, რასაც ვეუბნებით, არამედ იმასაც, როგორ ვესაუბრებით სხვებს, როგორ ვრეაგირებთ სირთულეებზე, როგორ ვზრუნავთ საკუთარ თავზე და რამდენად ბედნიერები ვართ. სწორედ ამიტომ, აღზრდის ყველაზე ძლიერი ინსტრუმენტი ხშირად ჩვენი პირადი მაგალითია.

კლინიკური ფსიქოლოგი ნანა ფიფია, მშობლებს აღმზრდელობითი პროცესის იმ ნიუანსებს შეახსენებს, რომლებსაც მიზანმიმართული განზრახვის გარეშე ვახორციელებთ.

ნანა ფიფია:

"იცით, განსაკუთრებულად როდის მუშაობს აღმზრდელობითი პროცესი? გაგიკვირდებათ და სწორედ მაშინ, როდესაც თქვენ ამით არ ხართ დაკავებული.

ბავშვისთვის აღმზრდელობითი მნიშვნელობა და დატვირთვა აქვს იმას, რასაც ის ისმენს და ხედავს სწორედ მაშინ, როდესაც მშობელი მიზანმიმართულად არ არის მისი აღზრდით დაკავებული.

• ისაუბრეთ ისე, როგორც გინდათ რომ ისაუბროს თქვენმა შვილმა.
• იურთიერთეთ ადამიანებთან ისე, როგორც გინდათ რომ იურთიერთოს თქვენმა შვილმა.
• მოიქეცით ისე, როგორც გინდათ რომ იქცეოდეს თქვენი შვილი.
• გინდათ რომ თქვენი შვილი იყოს თავისუფალი პიროვნება? იყავით მისთვის მაგალითი.
• გინდათ სწავლობდეს-ისწავლეთ თქვენ!
• გინდათ სწორად იკვებოს? სწორედ ასე იკვებეთ თქვენც!
• გინდათ ჯანსაღი ცხოვრებით იცხოვროს? თქვენი მაგალითით დაეხმარეთ ამაში.
• გინდათ რომ იყოს ბედნიერი? თქვენ უნდა იყოთ ბედნიერი..."