როგორ შევარჩიოთ სწორად სასკოლო ჩანთა?

სკოლის დაწყებასთან ერთად მშობლების წინაშე უამრავი საზრუნავი ჩნდება, რომელთა შორის ერთ-ერთი ყველაზე მნიშვნელოვანი სასკოლო ჩანთის შერჩევაა.

ხშირად ყურადღებას მხოლოდ ჩანთის ვიზუალსა და ტევადობაზე ვამახვილებთ, თუმცა პედიატრები გვაფრთხილებენ, რომ არასწორად შერჩეულმა ზურგჩანთამ შესაძლოა ბავშვის ხერხემალსა და საყრდენ-მამოძრავებელ სისტემას სერიოზული საფრთხე შეუქმნას.

იმისათვის, რომ თავიდან აიცილოთ ჯანმრთელობის შესაძლო პრობლემები, პედიატრი თაკო ძაგანია ამერიკის პედიატრიის აკადემიის რეკომენდაციებზე დაყრდნობით, რამდენიმე ოქროს წესსა და პრაქტიკულ რჩევას გვიზიარებს.

"როგორ უნდა შეარჩიოთ ბავშვის სკოლის ზურგჩანთა სწორად და როგორ უნდა ატაროს ეს ჩანთა სწორად.? - ამას დიდი მნიშვნელობა აქვს, რადგან არასწორმა ზურგჩანთამ შეიძლება ბავშვის საყრდენ-მამოძრავებელ სისტემას პრობლემები შეუქმნას.

ამერიკის პედიატრიის აკადემიის რეკომენდაციით გაითვალისწინეთ შემდეგი მახასიათებლები.

• ჩანთას უნდა ჰქონდეს ორი მხრის ღვედი, ფართო და რბილი ბალიშებით დაფარული, რადგან ვიწრო ღვედები შეიძლება ზედმეტ ზეწოლას აწარმოებდეს მხრებზე.

• ცალ მხარეს ჩანთის ტარება არ არის რეკომენდებული, რადგან ასე დატვირთვა ხერხემალზე ასიმეტრიულად ნაწილდება.

• ზურგის მხარე უნდა იყოს სქელი და რბილი, რათა ჩანთაში ჩალაგებული წიგნების ან მყარი ნივთების კუთხეები ბავშვს ზურგში არ შეერჭოს.

• სასურველია, თუ ექნება დამატებითი ქამარი გულმკერდზე ან წელზე. ასე წონის გადანაწილება უფრო თანაბრად ხდება და მცირდება დატვირთვა ხერხემალზე.

• კარგია, თუ ექნება მრავალი განყოფილება. ესეც სიმძიმის თანაბარ გადანაწილებას უზრუნველყოფს. ჯობს, რომ ყველაზე მძიმე წიგნები ან, მაგალითად, ლეპტოპი ჩადოთ ზურგთან ყველაზე ახლო დიდ განყოფილებაში, იმისთვის, რომ ძირითადი სიმძიმე სხეულის სიმძიმის ცენტრთან ახლოს იყოს.
  
• მნიშვნელობა აქვს ჩანთის ზომასაც. იგი ბავშვის სხეულის ზომის პროპორციული უნდა იყოს. მისი ძირი არ უნდა ჩამოსცდეს ბავშვის თეძოს კიდეს.

არსებობს ნიშნები, რომლებიც მიგახვედრებთ, რომ სკოლის ჩანთა არასწორადაა შერჩეული.

• სიარულის დროს ბავშვი წინ იხრება;
  
• ჩანთის მოხსნისას მხრებზე ნაკვალევი რჩება;
  
• ხშირად უჩივის ზურგის ტკივილს;
  
• უჭირს ჩანთის დამოუკიდებლად მოხსნა და მოკიდება.
  

გაითვალისწინეთ ჩანთის სწორად შერჩევის წესები და გაუფრთხილდით თქვენი შვილების ჯანმრთელობას," - გვირჩევს პედიატრი.