სააღდგომო კვერცხების შენახვის არასწორი პრაქტიკა - მაია ბუწაშვილი განმარტავს

თუ სააღდგომოდ შეღებილი კვერცხები ისევ დაგრჩათ და კვირაცხოვლობისთვისაც ინახავთ, სასურველია იცოდეთ, რამდენად უსაფრთხოა მათი საკვებად გამოყენება შეღებვიდან ამდენი დღის შემდეგ.

ექიმი ინფექციონისტი მაია ბუწაშვილი განმარტავს, რა ვადით ინახება მოხარშული კვერცხი, როდის ხდება ის სარისკო და რომელ გავრცელებულ შეცდომას უშვებენ ადამიანები ყველაზე ხშირად.

"კიდევ ერთხელ გილოცავთ და შეგახსენებთ, რომ მოხარშული კვერცხი საკვებად ვარგისია და უმაცივროდ ძლებს მხოლოდ 2 საათის განმავლობაში, ხოლო მაცივარში 1 კვირამდე.

თუ ნაჭუჭი გატეხილია, მაშინ მაცივარში შენახვის ხანგრძლივობა სამ დღემდე მცირდება.

სააღდგომო კვერცხების შენახვის კიდევ ერთი არასწორი პრაქტიკაა უმი კვერცხის კონტეინერში შეღებილი კვერცხების ჩალაგება (ხშირად შეღებილი კვერცხი მაღაზიებში ასე იყიდება). ეს კონტეინერი უმი კვერცხის ნაჭუჭით არის დაბინძურებული და შეღებილი კვერცხის ნაჭუჭის კონტამინაციას ახდენს.

დღესასწაულების პერიოდში და შემდეგ მოწამვლა საკმაოდ ხშირია საკვების დიდი ხნით და არასწორი შენახვის გამო. ამას ხელს უწყობს ალკოჰოლის უზომო რაოდენობით მიღებაც. გისურვებთ ჯანმრთელობას," - წერს ექიმი.