სიკვდილით დასჯის 30 წლიანი მოლოდინი და მოულოდნელი დასასრული

50 წლის ამერიკელი კრისტა პაიკი, რომელიც სიკვდილით უნდა დაესაჯათ, ორ სასიკვდილო ინექციას გადაურჩა. ის საავადმყოფოში გადაიყვანეს. განაჩენის აღსრულება შეჩერებულია.

• კრისტა პაიკი პირველი ქალია, რომელიც ბოლო 200 წლის განმავლობაში ტენესის შტატში სიკვდილით უნდა დაესაჯათ. ის მკვლელობის ბრალდებითაა გასამართლებული. განაჩენი ოთხშაბათს უნდა აღსრულებულიყო.
• პაიკი სასამართლოს მიერ გამოტანილი სასიკვდილო განაჩენის აღსრულებას 1996 წლიდან ელოდება. გამოძიების თანახმად, 1995 წელს კრისტა პაიკმა, რომელიც 18 წლის იყო, თავის მეგობარ ბიჭთან, 17 წლის ტადარილ შიპთან ერთად სცემა, აწამა და მოკლა 19 წლის გოგონა, კოლინ სლემერი. შიპს სამუდამო პატიმრობა აქვს მისჯილი.

***

2026 წლის 28 სექტემბერს ტენესის შტატის გუბერნატორმა ბილ ლიმ არ დააკმაყოფილა კრისტა პაიკის თხოვნა შეწყალების შესახებ.

30 სექტემბერს აშშ-ის ფედერალურმა სააპელაციო სასამართლომ განაჩენის აღსრულება შეაჩერა და დაადგინა, რომ ხელახლა გამოსაკვლევია, პაიკისთვის სასიკვდილო განაჩენის გამოტანისას სათანადოდ იყო თუ არა გათვალისწინებული მისი განცხადებები სექსუალური ძალადობის შესახებ. რამდენიმე საათში აშშ-ის უზენაესმა სასამართლომ სააპელაციო სასამართლოს გადაწყვეტილება გააუქმა.

მას შემდეგ რაც კრისტა პაიკი ორ სასიკვდილო ინიექციას გადაურჩა, ტენესის შტატის გუბერნატორმა შეაჩერა ამ წელს ყველა სასიკვდილო განაჩენის აღსრულება და მოითხოვა ყოველმხრივი და დამოუკიდებელი შემოწმება იმის დასადგენად, თუ რა მოხდა პაიკის განაჩენის აღსრულებისას.

• აშშ-ში ქალებს სიკვდილით იშვიათად სჯიან. 1976 წლიდან, როცა სასჯელის უმაღლესი ზომის აღსრულება განაახლეს, სიკვდილით დასაჯეს 18 ქალი. კონკრეტულად ტენესის შტატში ქალი სიკვდილით აღარ დაუსჯიათ 1820 წლის შემდეგ.

• პაიკის ისტორია

პაიკი აცხადებდა, რომ 11 წლის ასაკში ის მეზობელმა გააუპატიურა; მან ასევე აღნიშნა, რომ დედის მეგობარი მამაკაცი მას ფიზიკურად და სექსუალურად ავიწროვებდა. მოგვიანებით პაიკის დეიდამ ჩვენება მისცა და განაცხადა, რომ გოგონას კრუნჩხვები აწუხებდა და 12 წლის ასაკში თვითმკვლელობაც სცადა.

1991 წელს, როდესაც პაიკი 15 წლის იყო, იგი ტკბილეულის მოპარვის მიზნით, საზოგადოებრივ ცენტრში შეჭრისას დაიჭირეს და ჩრდილოეთ კაროლინაში მდებარე არასრულწლოვანთა შეფასების ცენტრში გაგზავნეს; ცნობილია, რომ აღნიშნულ დაწესებულებაში სასჯელის მკაცრი სისტემა მოქმედებდა. პაიკი ცენტრში ერთ წელზე მეტხანს დარჩა; მან საშუალო განათლების დამადასტურებელი დოკუმენტი (GED) მიიღო და მასწავლებლის ასისტენტად დაიწყო მუშაობა.

შეწყალების შუამდგომლობის კონსულტანტი, რომელიც პაიკთან მუშაობდა, ამბობს:

„კრისტასთან საუბრისას მისი უკეთ გაცნობა შევძელი. ის გულახდილი იყო და მზადყოფნას გამოთქვამდა, განვითარებულიყო და უკეთესობისკენ შეცვლილიყო. მიუხედავად იმისა, რომ ფსიქოლოგიურ პრობლემებსა და მათგან გამომდინარე ქცევით სირთულეებს ებრძოდა, ვხედავდი, რომ კარგი ბავშვი იყო და ცდილობდა, სამყაროში საკუთარი ადგილი ეპოვა. არასდროს მინახავს, ​​რომ კრისტას აგრესია ან ძალადობა გამოევლინა. ის ცდილობდა, გზა ეპოვა ტრავმებისგან გასათავისუფლებლად და ესწავლა ცხოვრებისეულ სირთულეებთან გამკლავება."

1993 წელს ცენტრის დატოვების შემდეგ, იგი „ჯობ კორპსის“ (Job Corps) პროგრამაში ჩაირიცხა.

1995 წლის 12 იანვრის ღამეს, პაიკმა თავის შეყვარებულ შიპთან და მეგობარ პიტერსონთან ერთად, 19 წლის სლემერი, კამპუსის განცალკევებულ ადგილას მიიტყუა. ოთხივე სტუდენტმა ერთდროულად დატოვა საერთო საცხოვრებელი და ტყისკენ გაემართა.

პაიკმა და შიპმა სლემერი ტყის განცალკევებულ ადგილას მიიყვანეს და სასტიკად სცემეს. The New York Times-ის ცნობით, შიპმა ასევე განაცხადა, რომ მან სლემერის სხეულზე პენტაგრამა ამოკვეთა. სლემერის ცხედარი მეორე დილით იპოვეს და პოლიციამ მკვლელობის გამოძიება დაიწყო. 36 საათის განმავლობაში სამივე მოზარდი დააკავეს და მათ ბრალი წაუყენეს.

გამომძიებლებმა დაკავება მას შემდეგ განახორციელეს, რაც პაიკმა სლემერის თავის ქალის ნაწილი აიღო და ის დანაშაულთან კავშირის არმქონე პირს აჩვენა. Discovery-ის სერიალ Mean Girl Murders-ის თანახმად, იმ პერიოდში გამომძიებლებმა და მედიამ ეს მკვლელობა იმხანად გავრცელებულ „სატანურ პანიკას“ დაუკავშირეს — მიზეზად პენტაგრამა და შიპის ოთახში ნაპოვნი სავარაუდო სატანური საკურთხეველი იქცა.

„მედიამ ბოროტ ადამიანად და სატანის თაყვანისმცემლად გამომიყვანა“, — განაცხადა პაიკმა დოკუმენტურ ფილმში და უარყო, რომ სატანიზმით იყო დაინტერესებული. „სატანიზმითა და დემონოლოგიით ტადარილი იყო გატაცებული; ყველაფერი აქედან მოდის. მე კი მსგავსი რამეებით არასდროს ვყოფილვარ დაინტერესებული“.

WBIR-ის ცნობით, დაკავების შემდეგ პაიკმა დანაშაული აღიარა და მკვლელობის სცენა აღადგინა. სასამართლო დოკუმენტების თანახმად, პაიკს ეგონა, რომ სლემერი შიპით იყო დაინტერესებული, ამიტომ თავდაპირველად მხოლოდ მისი დაშინება და მასთან ჩხუბი სურდა. თუმცა „შეჩერება“ ვეღარ შეძლო.

რატომ მიუსაჯეს პაიკს სიკვდილით დასჯა?

პაიკი პირველი ხარისხის მკვლელობისა და პირველი ხარისხის მკვლელობის ჩადენის მიზნით შეთქმულების ბრალდებით, 1996 წლის მარტში, ტენესის შტატის ნოქსის ოლქში გაასამართლეს. პიტერსონმა პაიკის წინააღმდეგ ჩვენება მას შემდეგ მისცა, რაც დანაშაულის ჩადენის შემდეგ თანამონაწილეობისთვის, საპროცესო შეთანხმება გააფორმა და პირობითი მსჯავრი მიიღო.

მიუხედავად იმისა, რომ პროკურორები ამტკიცებდნენ, პაიკმა სლემერი განზრახ მოკლა, რათა ის თავისი შეყვარებულისგან დაეშორებინა, დაცვის მხარე აცხადებდა, რომ ბრალდებულს ფსიქიკური ჯანმრთელობის პრობლემები ჰქონდა და საკუთარ ქმედებებს სრულად ვერ აკონტროლებდა.

მოგვიანებით პაიკმა გამოცემა The Times-ს განუცხადა, რომ მის ადვოკატს, რომელიც სასამართლომ დაუნიშნა, სიკვდილით დასჯის საქმეზე მუშაობის გამოცდილება არ ჰქონდა და ფსიქიკურ დაავადებებს განსხვავებულად აღიქვამდა. პაიკი ორივე ბრალდებაში დამნაშავედ ცნეს და სიკვდილით დასჯა მიუსაჯეს; ამით იგი ტენესის შტატში ბოლო 200 წლის განმავლობაში პირველი ქალი გახდა, რომელსაც სიკვდილით დასჯა მიესაჯა.