სხვებს ყველაფერს პატიობთ, საკუთარ თავს კი არაფერს? - ნახე რას ამბობენ ფსიქოლოგები

ზოგ ადამიანს ბუნებრივად გამოსდის სხვების მიმართ კეთილი, გამგები და შემწყნარებელი იყოს, მაგრამ როცა საქმე საკუთარ შეცდომას, წარუმატებლობას ან სისუსტეს ეხება, იგივე ადამიანები ყველაზე მკაცრ მოსამართლეებად იქცევიან ხოლმე.

ახალი კვლევა აჩვენებს, რომ ასეთი დამოკიდებულება ფსიქოლოგიური კეთილდღეობისთვის უმნიშვნელო სულაც არ არის.

McGill University-ისა და ჩილელი მკვლევრების კვლევამ, რომელშიც 1 286 კანადელი ზრდასრული მონაწილეობდა, საინტერესო ტენდენცია გამოავლინა.

მეცნიერებმა შეაფასეს, რამდენად თანაგრძნობით ეპყრობოდნენ ადამიანები საკუთარ თავს, სხვა ადამიანებსა და ცხოველებს და ეს მონაცემები სტრესის, შფოთვის, დეპრესიული სიმპტომების, ემოციების რეგულირებისა და ზოგადი კეთილდღეობის მაჩვენებლებს შეადარეს.

ყველაზე კარგი ფსიქოლოგიური მდგომარეობა იმ ადამიანებს ჰქონდათ, რომელთა თანაგრძნობაც მხოლოდ სხვებისკენ არ იყო მიმართული. ისინი საკუთარ თავსაც იმავე მზრუნველობით ექცეოდნენ.

ხოლო როდესაც ადამიანი სხვების მიმართ ძალიან მზრუნველი იყო, საკუთარი თავის მიმართ კი მკაცრი ან უყურადღებო, მისი კეთილდღეობის მაჩვენებლები არასახარბიელო აღმოჩნდა.

რას ნიშნავს საკუთარი თავის მიმართ თანაგრძნობა? ეს არ არის საკუთარი შეცდომების გამართლება, პასუხისმგებლობის თავიდან აცილება ან მიდგომა „რაც მინდა, იმას გავაკეთებ“. ესაა უნარი, რთულ მომენტში საკუთარ თავს ისე ელაპარაკო, როგორც იმ ადამიანს დაელაპარაკებოდი, ვინც გიყვარს.

„ბევრი ადამიანი, განსაკუთრებით მშობლები, ექიმები, მასწავლებლები, მომვლელები, სხვებზე ძალიან ზრუნავს, საკუთარი თავის მიმართ კი მკაცრი რჩება“, - განმარტავს კვლევის ავტორი, McGill University-ის პროფესორი ბასამ ხური.

მისი თქმით, საკუთარი თავის მიმართ თანაგრძნობა შესაძლოა დაგვეხმაროს რთული ემოციების მართვაში, თვითკრიტიკის შემცირებასა და შინაგანი უსაფრთხოების განცდის შექმნაში.

კვლევის ავტორები აღნიშნავენ, რომ ამ ეტაპზე კვლევა მიზეზ-შედეგობრივ კავშირს ვერ ამტკიცებს და უფრო ხანგრძლივი დაკვირვებაა საჭირო, თუმცა ერთი ცხადია, საკუთარი თავის მიმართ დადებითი დამოკიდებულება მნიშვნელოვანია.

საკუთარ თავზე ზრუნვა სხვებზე ნაკლებ ზრუნვას არ ნიშნავს. პირიქით, თუ მთელი თანაგრძნობა გარეთ გაგვაქვს და საკუთარ თავს არაფერს ვუტოვებთ, ამ დამოკიდებულების ფასი შესაძლოა სწორედ ჩვენმა ფსიქოლოგიურმა კეთილდღეობამ გადაიხადოს.

წყარო: Personality and Individual Differences.