სულგუნი ლიონიდან - საფრანგეთში დამზადებული ქართული ყველის რეცეპტი

სულგუნი ქართული ყველის სახეობაა, რომელიც ძროხის ან კამეჩის ახალმოწველილი რძისგან მზადდება. მას ახლა თითქმის მთელ საქართველოში ამზადებენ, თუმცა ტრადიციულად სამეგრელოსა და სვანეთის რეგიონებში აწარმოებდნენ.

სულგუნის დამზადებისას ახლად ამოყვანილ „ჩვილ“ ყველს ჩაჭრიან რძეში ან თბილ წყალში და ზელენ ხელით ვიდრე არ ამოიწელება. შემდეგ ამ მასას მოაყრიან მარილს, მრგვალ თავებად შეახვევენ, ერთხანს ცივ წყალში ამყოფებენ და მერე შესანახად ჩაყრიან წათხში.

უკანასკნელ დღეებში სოციალურ ქსელებში დიდი გამოხმაურება მოჰყვა ქართველი ემიგრანტის, გვანცა ძნელაძის მიერ მომზადებულ სულგუნს, რომელიც გვანცამ არც მეტი, არც ნაკლები, საფრანგეთის ქალაქ ლიონში მოამზადა.

„სულგუნი ლიონიდან

ცხელ წყალში ვათავსებ თხელ ნაჭრებად დაჭრილ ჭყინტ ყველს. ვურევ, ველოდები დნობას და ვიღებ პრიალა, ელასტიკურ მასას.

თქვენ როგორ აკეთებთ სულგუნს?“- დაწერა საკუთარ კულინარიულ გვერდზე მოყვარულმა კულინარმა და სულგუნის მზადების სრული პროცესის ვიდეოგაკვეთილიც განათავსა.