ცხოველი, რომელიც ზამთარში იყინება და გაზაფხულზე „ცოცხლდება“

ბუნებაში არსებობს ცხოველი, რომელიც ზამთარში თითქოს კვდება. მისი გული ჩერდება, სუნთქვა წყდება, სხეული იყინება და თვეების განმავლობაში ის უძრავად წევს გაყინულ მიწაზე... მაგრამ როცა გაზაფხული მოდის, ეს არსება ნელ-ნელა ცოცხლდება და ჩვეულებრივ ცხოვრებას აგრძელებს.

ამ ცხოველს ტყის ბაყაყი ჰქვია. ის ჩრდილოეთ ამერიკის ცივ რეგიონებში ბინადრობს, სადაც ზამთარში ტემპერატურა, როგორც წესი, მკვეთრად ეცემა.

როცა სიცივე იწყება, ბაყაყის სხეულში საოცარი პროცესები ხდება: მისი გული წყვეტს ცემას, სუნთქვა პრაქტიკულად ჩერდება, სხეულის 60–70% იყინება და სისხლი საერთოდ აღარ მოძრაობს.

ბიოლოგიურად ეს მდგომარეობა სიკვდილს ჰგავს, მაგრამ სინამდვილეში ეს გადარჩენის სტრატეგიაა. ამ დროს ბაყაყის ორგანიზმი იწყებს დიდი რაოდენობით გლუკოზისა და გლიცერინის გამოყოფას. სანამ ბაყაყი უძრავადაა, ეს ნივთიერებები მოქმედებს როგორც ბუნებრივი „ანტიფრიზი“ - იცავს უჯრედებს გაყინვისგან და არ აძლევს მათ დაზიანების საშუალებას.

გაზაფხულზე, როცა ტემპერატურა აიწევს ბაყაყის გაყინული სხეული ნელ-ნელა დნება, გული ისევ იწყებს ცემას და რამდენიმე საათში ბაყაყს უკვე მოძრაობა შეუძლია.

მეცნიერები ამბობენ, რომ ტყის ბაყაყის ამ უნარმა დიდი გავლენა მოახდინა მედიცინის გარკვეულ მიმართულებებზე. კერძოდ, ტყის ბაყაყმა შთააგონა კვლევები:

• ორგანოების შენახვაზე ტრანსპლანტაციისთვის

• ქსოვილების დაცვაზე ძლიერი სიცივის დროს

• მედიცინაში „გაყინვის“ ტექნოლოგიების განვითარებაზე.

ეს პატარა ცხოველი დღესაც შთაგონების წყაროა თანამედროვე მეცნიერებისთვის.