"ტუჩის აუგმენტაცია ხდება „ბოდი ფილერებით“. ეს ძალიან საშიშია - სპეციალისტის გაფრთხილება

ზღვარი მომგებიან ბიზნესსა და პაციენტის ჯანმრთელობაზე ზრუნვას შორის, სილამაზის ინდუსტრიაში, ხშირად იკარგება.

ბოლო დროს სულ უფრო ხშირად საუბრობენ საგანგაშო ტენდენციაზე, რომელიც ესთეტიკურ პროცედურას ხელმისაწვდომს, მაგრამ სარისკოს ხდის.

ზოგიერთი კოსმეტოლოგი ტუჩის აუგმენტაციისათვის (გადიდებისთვის) ტანისთვის განკუთვნილ, ე.წ. „ბოდი ფილერებს“ იყენებს.

ერთი შეხედვით, ფორმულა „მარტივია“. ტანის ფილერი დიდი, 100-მილილიტრიანი შეფუთვებით გამოდის, ბევრად იაფი ჯდება და კლინიკას თუ არაკეთილსინდისიერ სპეციალისტს, უზარმაზარ მოგებას აძლევს, პაციენტს კი „ხელმისაწვდომ ფასს“.

თუმცა რისკი ფასზე მაღალია. სხეულის მსხვილი ზონებისთვის (მაგალითად, დუნდულებისთვის) შექმნილი სქელი, მაღალი სიმკვრივის პრეპარატის სახის ნაზ ქსოვილებში შეყვანა, უმძიმესი გართულებების, ქსოვილების ნეკროზისა და დეფორმაციის პირდაპირი წინაპირობაა.

სად გადის ზღვარი ეკონომიურ პროცედურასა და ჯანმრთელობის დაზიანებას შორის და რატომ აყენებენ არაკეთილსინდისიერი ექიმები ფინანსურ მოგებას პაციენტის უსაფრთხოებაზე მაღლა? ამ თემაზე პოდკასტში "ყველაფერი ესთეტიკაზე", ექიმმა დერმატო-ვენეროლოგმა, დერმატოქირურგმა თაკო ლოლუამ ისაუბრა.

„არის შემთხვევები და საკმაოდ ხშირად, რომ ტუჩის აუგმენტაცია ხდება „ბოდი ფილერებით“. ამ ფილერებს შორის განსხვავება ძალიან დიდია.

ტანისთვის შექმნილი ფილერი (ბუნებრივი შემავსებელი) არის სხვა სიმკვრივის და სხვა სტრუქტურული მახასიათებლის. ის შექმნილი ისე, რომ მაგალითად, დუნდულას ზონაზე უნდა გაუძლოს სულ სხვანაირ დატვირთვას. შესაბამისად, ის ბევრად უფრო სქელია.

მარტივად რომ ავხსნა ეს მექანიზმი, მიზეზი ისაა, რომ "ბოდი ფილერი" იაფია!

დიდი შეფუთვით, ასე ვთქვათ „მაწვნის ქილის“ შეფუთვით (30, 60, 100 მილილიტრიანი შეფუთვით), პრეპარატის ღირებულება გაცილებით უფრო დაბალია, ვიდრე ინდივიდუალური 1 მილილიტრი ტუჩისთვის შექმნილი ფილერი.

ამიტომ, ამ დიდი შეფუთვიდან შპრიცებში ამოღებული, თითო-თითო მილილიტრი პრეპარატი, არის გაცილებით მომგებიანი სპეციალისტისთვის და გაცილებით იაფი პაციენტისთვის... თუმცა მას ახლავს გაცილებით დიდი გართულების რისკი,“ - გვაფრთხილებს სპეციალისტი.