უსაფრთხოა თუ არა ჩვილის წაყვანა ზღვაზე? - პედიატრის რჩევები მშობლებს

ზაფხულის დადგომასთან ერთად, ბევრი მშობლის წინაშე დგება კითხვა - უსაფრთხოა თუ არა ჩვილის წაყვანა ზღვაზე და რა ასაკიდან შეიძლება პატარას წყალში ჩაყვანა?
ზღვის ჰაერი და დასვენება პატარას ჯანმრთელობისთვის სასარგებლოა, თუმცა სეზონური რისკების თავიდან ასაცილებლად აუცილებელია მარტივი, მაგრამ კრიტიკულად მნიშვნელოვანი წესების დაცვა.

პედიატრი თამარ ობგაიძე გვთავაზობს პრაქტიკულ რჩევებს მზისგან დაცვის, ინფექციების პრევენციისა და წყალში უსაფრთხო ჭყუმპალაობის შესახებ.

გაეცანით ძირითად რეკომენდაციებს, რომლებიც დაგეხმარებათ, თქვენი პატარას საზაფხულო დასვენება მაქსიმალურად უსაფრთხო და კომფორტული გახდეს.

„ხშირად მეკითხებიან, შეიძლება თუ არა წავიყვანოთ ჩვილი ზღვაზე? რა თქმა უნდა შეიძლება. მთავარია, რომ დაიცვათ სიფრთხილის ზომები.

რა სიფრთხილეა საჭირო და რა საფრთხეები არსებობს?

1. დაცვა მზისგან

გამომდინარე იქიდან, რომ ზაფხულია და მზის აქტივობა მაღალია, არ გაიყვანოთ პატარა 11:00-დან 17:00 საათამდე მზეზე და აუცილებლად გამოიყენეთ მზისგან დამცავი საშუალებები.

2. ინფექციები.
განსაკუთრებით საყურადღებოა კანის ინფექციები და დიარეით მიმდინარე დაავადებები, ამიტომაც ჰიგიენური ღონისძიებების გატარება აუცილებელია.

3. მზის დაკვრა და ასევე სითბური დაკვრა
ამ პრობლემის თავიდან ასაცილებლად აუცილებელია შესაბამისი თავის დაცვას მზისგან და ასევე, მაღალი ტემპერატურის დროს, უნდა შეიზღუდოს ფიზიკური აქტივობა.

და ბოლოს, რა ასაკიდან შეიძლება ჩავიყვანოთ ბავშვი წყალში?

პრინციპში, ერთიანი კონსენსუსი არ არსებობს, თუმცა მიღებულია, რომ 6 თვემდე ბავშვის ჩაყვანა წყალში არ ღირს.
უკვე 6 თვიდან, როდესაც მას კარგად უჭირავს თავი და კისერი, შეგიძლიათ ბავშვი ზღვაში ჩაიყვანოთ. ოღონდ იმ პირობით, რომ ის იქნება ვერტიკალურ მდგომარეობაში და შეეცადეთ, რომ არ ჩაყლაპოს წყალი.

წყლიდან ამოყვანის შემდეგ, კანის ინფექციებისგან თავის დასაცავად, აუცილებლად დაბანეთ რბილი, საბავშვო დასაბანი საშუალებით და გადაავლეთ წყალი," - გვირჩევს პედიატრი.