ვისთვისაა სახიფათო კანის მოვლის იმ პროდუქტების გამოყენება, რომლებიც მიკროსპიკულებს შეიცავს? - ნინო ხაინდრავა გვირჩევს

თანამედროვე ბიუთი-სამყარო მუდმივად ეძებს გზებს, რათა საყვარელმა კრემებმა თუ შრატებმა კანის უფრო ღრმა ფენებში შეაღწიონ და მაქსიმალური შედეგი მოგვცენ.

ბოლო დროს, კოსმეტიკურ ბაზარზე გამოჩნდა ახალი, რევოლუციური კომპონენტი კანის მოვლის საშუალებებში - მიკროსპიკულები (ზღვის ღრუბლებისგან მიღებული მიკროსკოპული ნემსები).

მიკროსპიკულები კანის ზედაპირზე ქმნიან უხილავ არხებს, რაც აქტიურ ნივთიერებებს (მაგალითად, პეპტიდებსა და დაბერების საწინააღმდეგო კომპონენტებს) ეხმარება, რომ პირდაპირ დანიშნულების ადგილამდე მივიდნენ. ბევრი ამ მეთოდს „სახლის პირობებში მინიმკურნალობას“ ან „უმტკივნეულო მეზოთერაპიასაც“ უწოდებს. თუმცა ეს ინოვაციური მეთოდი ყველასთვის უსაფრთხო არ არის.

ექიმი კოსმეტოლოგი ნინო ხაინდრავა გვაფრთხილებს, რომ კანის ზოგიერთი დაავადების დროს, მიკრონემსების შემცველი საშუალებების გამოყენება დაუშვებელია.

„რისთვის ამატებენ მიკროსპიკულებს კოსმეტიკურ საშუალებებში?

პირველი - ეს არის უფრო კარგი შეღწევადობა კანში იმ აქტივების, რომელიც არის კონკრეტულ პროდუქტში მოცემული.

მაგრამ გაითვალისწინეთ, მიკროსპიკულები არ მოუხდება იმათ, ვისაც აქვთ, მაგალითად, როზაცეა ან მეტად მგრძნობიარე კანი.

ძალიან კარგია პირველი ასაკობრივი ცვლილებების დროს. ასევე უხდება, მაგალითად, პეპტიდურ შრატებს, რომლებიც მუშაობენ ანტიასაკობრივ (anti-age) ეფექტზე.

გაითვალისწინეთ, რომ მიკროსპიკულების შრატების გამოყენების შემდეგ (ძირითადად ეს ელემენტი შრატებში არის ხოლმე), აუცილებლად უნდა გამოვიყენოთ საცხი, რომელიც მუშაობს კანის აღდგენაზე," - გვაფრთხილებს ნინო ხაინდრავა.