როგორ ადამიანებში მატულობს ქრონიკული ტკივილი

თუ ქრონიკული ტკივილი გაწუხებთ, პრობლემის მიზეზი შესაძლოა საკუთარი თავის მიმართ მკაცრი დამოკიდებულება იყოს. უფრო მეტიც, ახალი კვლევის თანახმად, ზედმეტად თვითკრიტიკულმა დამოკიდებულებამ, შესაძლოა ქრონიკული ტკივილი გააუარესოს.

მკვლევრებმა აღმოაჩინეს, რომ ისეთი ქრონიკული დაავადებების მქონე ადამიანებს, როგორიცაა შაკიკი, ზურგის ტკივილი ან ართრიტი, პერფექციონიზმის უფრო მაღალი ქულები აქვთ და ხშირად ნაკლებად სჯერათ საკუთარი შესაძლებლობების.

ავსტრალიაში, მერდოკის უნივერსიტეტის მიერ ჩატარებულმა საერთაშორისო კვლევამ, ქრონიკული ტკივილის მქონე 500-ზე მეტი ზრდასრული ადამიანი, ისეთი ადამიანების ჯგუფს შეადარა, რომლებსაც ეს ტკივილები არ ჰქონდათ.

კვლევის მონაწილეებმა უპასუხეს ონლაინ გამოკითხვებს სამი მახასიათებლის შესახებ - პერფექციონიზმი, საკუთარი თავის მიმართ თანაგრძნობა და თავდაჯერებულობა.

შედეგებმა აჩვენა, რომ ქრონიკული ტკივილის მქონე პირები ახდენდნენ ძლიერ ზეწოლას საკუთარ თავზე, სხვების მოლოდინების დასაკმაყოფილებლად. ისინი ასევე გაცილებით ნაკლებად თანამგრძნობები იყვნენ საკუთარი თავის მიმართ და აკლდათ თავდაჯერებულობა ყოველდღიური პრობლემების გადაწყვეტისას.

ადამიანები, რომლებიც უფრო მკაცრი იყვნენ საკუთარი თავის მიმართ, უფრო მეტად ცდილობდნენ ტკივილის გადალახვას არარეალური სტანდარტების დასაკმაყოფილებლად, რაც უფრო მეტ სტრესს და იმედგაცრუებას იწვევდა.

მეცნიერების აზრით, ეს იმაზე მიუთითებს, რომ ფიზიკურ მდგომარეობას აუარესებს არა მხოლოდ ფიზიკური ტკივილი, არამედ ის, თუ როგორ აღიქვამს ადამიანი საკუთარ ტკივილს.