"ზღვაში მხოლოდ შავი წერტილი ჩანდა" - როგორ გადაარჩინა გიორგი ჯოლოგუამ ესპანელი ტურისტი სიკვდილს?

"ზღვის ზედაპირზე შორიდან მხოლოდ პატარა შავი წერტილი ჩანდა. თუმცა, როდესაც გიორგი ჯოლოგუა წერტილს ნავით მიუახლოვდა, მიხვდა, რომ წყალში ადამიანი იმყოფებოდა და უკანასკნელი ძალებით დახმარებას ითხოვდა," - ასე დაიწყო გადარჩენის ოპერაცია, რომელმაც ესპანელი ტურისტის სიცოცხლე იხსნა და საქართველოს მოქალაქე ირლანდიური მედიის ყურადღების ცენტრში მოაქცია.

ამბავი, რომელიც ამ დღეებში ქართულ მედიაში გავრცელდა, სინამდვილეში 2024 წლის 21 აპრილს, დუბლინის სანაპიროსთან მოხდა.

Dublin Live-ის ინფორმაციით, იმ საღამოს გიორგი ჯოლოგუა კომპანია Howth Cliff Cruises-ის ნავს მართავდა. დაახლოებით 18:30 საათზე მან წყალში საეჭვო ობიექტი შენიშნა.

როგორც თავად გიორგი გამოცემასთან საუბრისას იხსენებს, ჩვეულებრივ, კუნძულს აღმოსავლეთის მხრიდან უვლიდა, თუმცა იმ დღეს გაურკვეველი მიზეზით მარშრუტი შეცვალა და ჩრდილო-დასავლეთისკენ წავიდა. დაახლოებით 300 მეტრის დაშორებით მან წყალში რაღაც შავი დაინახა. თავდაპირველად იფიქრა, რომ ეს ტივტივა ან სელაპი იყო, თუმცა მალევე შენიშნა, რომ ადამიანი მოძრაობდა და ხელების ქნევით დახმარებას ითხოვდა.

წყალში მყოფი ახალგაზრდა მამაკაცი ნაპირიდან დაახლოებით ერთი კილომეტრის დაშორებით, სანავიგაციო ტივტივას იყო ჩაჭიდებული. მას ძალა თითქმის აღარ ჰქონდა. ძლიერი დინების, სიცივისა და დაღლილობის გამო გადაადგილებას ვეღარ ახერხებდა და მძიმე ჰიპოთერმიის ნიშნები აღენიშნებოდა.

გიორგიმ ნავი მაშინვე გააჩერა, წყალში სამაშველო რგოლი გადააგდო და მამაკაცი ნავზე ამოიყვანა. გადარჩენილი ესპანელი ტურისტი აღმოჩნდა, რომელიც Burrow Beach-იდან ძლიერმა დინებამ გაიტაცა.

„თავს გმირად არ ვგრძნობ. ჩემს ადგილზე ყველა იმავეს გააკეთებდა“, - განაცხადა გიორგი ჯოლოგუამ. მისი თქმით, საბედნიერო შემთხვევითობა იყო, რომ იმ დღეს ჩვეული მარშრუტით არ წავიდა. რომ ნავით კუნძულის აღმოსავლეთ მხარეს გაევლო, წყალში მყოფ ადამიანს, შესაძლოა, დახმარება ვეღარ მიეღო.

ღია ზღვაში მოხვედრილი ადამიანის სხეული სიცივეში სწრაფად კარგავს ენერგიას. დაღლილობის მატებასთან ერთად ადამიანს ტივტივაზე ხელის ჩაჭიდებაც უჭირს, ხოლო დაბალი ტემპერატურა აზროვნებისა და მოძრაობის უნარს თანდათან აქვეითებს. ახალგაზრდა ტურისტი უკვე იმ მდგომარეობაში იყო, როდესაც საკუთარი ძალებით ნაპირზე დაბრუნება აღარ შეეძლო. რამდენიმე წუთით დაგვიანება შესაძლოა საბედისწერო აღმოჩენილიყო.

გიორგი ჯოლოგუას ყურადღებამ და სწრაფმა რეაგირებამ ამ ისტორიის დასასრული სრულიად შეცვალა.

Dublin Live-მა ქართველი მეზღვაური „სწრაფად მოაზროვნე“ და „გმირი“ ადამიანის სახელით გააცნო მკითხველს. გამოცემა ასევე აღნიშნავდა, რომ შემთხვევის დროს, გიორგი ჯოლოგუა ირლანდიაში საერთაშორისო დაცვას ითხოვდა და Howth Cliff Cruises-ში მუშაობდა.

სულ ახლახან,Dublin Live-მ ქართველი გმირ კიდევ ერთხელ გაიხსენა.
გამოცემა იუწყება, რომ გიორგი ჯოლოგუამ ლტოლვილის სტატუსი მიიღო და ირლანდიაში დარჩენის უფლება მიეცა. გავრცელებული ინფორმაციით, იგი ქვეყანაში პარტნიორთან და ახალშობილ ქალიშვილთან ერთად იცხოვრებს.

„ლტოლვილის სტატუსი მივიღე და ამის გამო ძალიან ბედნიერი ვარ“, - ამბობს გიორგი Dublin Live-ის მიერ გავრცელებულ ვიდეოში.

მედიის მასალებში სტატუსის მინიჭება გიორგის მიერ ადამიანის გადარჩენის შემდეგ განვითარებული ისტორიის გაგრძელებად არის წარმოდგენილი. თუმცა საჯაროდ ხელმისაწვდომ ინფორმაციაში არ არის მითითებული, რომ ირლანდიის ხელისუფლებამ ლტოლვილის სტატუსი უშუალოდ მისი გმირული საქციელის გამო მიანიჭა. ასეთი გადაწყვეტილებები, ჩვეულებრივ, საერთაშორისო დაცვის საქმის ინდივიდუალური განხილვის საფუძველზე მიიღება.

გიორგი ჯოლოგუა ირლანდიაში Howth Cliff Cruises-ში მუშაობას აგრძელებს. კომპანია დუბლინის სანაპიროსა და Ireland’s Eye-ის გარშემო ტურისტულ გასეირნებებს აწყობს.